(វ៉ាស៉ីនតោន)៖ ម្ចាស់សន្លឹកឆ្នោតម្នាក់នៅឯសហរដ្ឋអាមេរិក បានឈ្នះរង្វាន់ទឹកប្រាក់ចំនួនដល់ទៅ ១.៣៥ពាន់លានដុល្លារ ក្នុងកម្មវិធីឆ្នោតផ្សងសំណាង Mega Millions។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី១៥ ខែមករា ឆ្នាំ២០២៣។

អត្តសញ្ញាណអ្នកដែលឈ្នះ គឺមិនត្រូវទាន់បានដឹងជាសាធារណៈនៅឡើយទេ ប៉ុន្តែក្រុមអ្នករៀបចំកម្មវិធីឆ្នោតផ្សងសំណាងនេះ បានឱ្យដឹងកាលពីថ្ងៃសៅរ៍ថា សន្លឹកឆ្នោតដែលឈ្នះរង្វាន់ទឹកប្រាក់ខ្ទង់ពាន់លានដុល្លារខាងលើ ត្រូវបានលក់នៅក្នុងរដ្ឋមេន (Maine)។ សន្លឹកឆ្នោតដែលថ្លៃត្រឹម២ដុល្លារប៉ុណ្ណោះនោះ ត្រូវបានគេទិញក្នុងហាងលក់ទំនិញ Hometown Gas & Grill ស្ថិតនៅក្រុងលីបាណុន។

ដើម្បីអាចបើកប្រាក់រង្វាន់ពេញ១.៣៥ពាន់លានដុល្លារនេះបាន អ្នកឈ្នះគឺតម្រូវឱ្យទទួលប្រាក់នេះក្នុងចំនួនកំណត់មួយជាប្រចាំឆ្នាំ សម្រាប់​រយៈពេលសរុប២៩ឆ្នាំឯណោះ។ ហេតុដូច្នេះហើយ ម្ចាស់សន្លឹកឆ្នោតភាគច្រើនសុខចិត្តជ្រើសរើសយកជម្រើស បើកប្រាក់រង្វាន់សរុបតែម្តងវិញដែល​ឆាប់រហ័សជាង ប៉ុន្តែទឹកប្រាក់ត្រូវបានកាត់បន្ថយ។ យោងតាមការគណនា បើបើកសរុប ប្រាក់រង្វាន់១.៣៥ពាន់លានដុល្លារនោះ នឹងត្រូវថយមកនៅ​ខ្ទង់៧២៤.៦លានដុល្លារ ពោលគឺខាតជាងពាក់កណ្តាល។

គួរបញ្ជាក់ថា ការចាប់ឆ្នោត Mega Millions នៅសហរដ្ឋអាមេរិក បានបន្តប្រព្រឹត្តទៅចាប់តាំងពី វារកឃើញអ្នកឈ្នះលើកចុងក្រោយ កាលពីថ្ងៃទី១៤ ខែតុលា ឆ្នាំ២០២២ នៅពេលប្រាក់រង្វាន់៥០២លានដុល្លារ ត្រូវបានចែករំលែករវាងសន្លឹកឆ្នោតដែលឈ្នះចំនួន២ នៅរដ្ឋកាលីហ្វរញ៉ា និងរដ្ឋផ្លូរីដា។ សម្រាប់រង្វាន់១.៣៥ពាន់លានដុល្លារខាងលើ គឺជារង្វាន់ទឹកប្រាក់ធំបំផុតលំដាប់ទី២ ក្នុងប្រវត្តិសាស្រ្តរយៈពេល២០ឆ្នាំមកនេះ នៃកម្មវិធីឆ្នោតផ្សងសំណាង Mega Millions។ រីឯរង្វាន់កំពូលលំដាប់ទី១ គឺទឹកប្រាក់១.៥៣៧ពាន់លានដុល្លារ ត្រូវបានឈ្នះនៅរដ្ឋការ៉ូលីណាខាងត្បូង កាលពីខែតុលា ឆ្នាំ២០១៨៕