(ប៉េកាំង)៖ ឯកអគ្គរដ្ឋទូតចិនប្រចាំនៅរុស្ស៉ី លោក ចាង ហានហ៊ុយ (Zhang Hanhui) បានប្រាប់ប្រព័ន្ធផ្សព្វផ្សាយរុស្ស៊ីថា ប្រទេសរុស្ស៊ី និងប្រទេសចិនបានត្រៀមខ្លួនរួចជាស្រេច ដើម្បីបើកការធ្វើដំណើរទៅវិញទៅមក ឲ្យបានឆាប់តាមដែលអាចធ្វើទៅបាន និងធ្វើឲ្យកាន់តែស៊ីជម្រៅនូវកិច្ចសហប្រតិបត្តិការយុទ្ធសាស្ត្ររបស់ប្រទេសទាំងពីរ។ នេះបើយោងតាមការចុះផ្សាយដោយទីភ្នាក់ងារសារព័ត៌មានរុស្ស៉ី TASS នៅថ្ងៃពុធ ទី១១ ខែមករា ឆ្នាំ២០២៣។

ក្នុងសុន្ទរកថាមួយដែលបានចេញផ្សាយនៅថ្ងៃពុធនេះ លោក ចាង បានប្រាប់ទីភ្នាក់ងារសារព័ត៌មាន TASS យ៉ាងដូច្នេះថា «ក្នុងលក្ខខណ្ឌប្រវត្តិសាស្ត្រថ្មី យើងបានត្រៀមខ្លួនជាស្រេចរួមជាមួយមិត្តរុស្ស៊ីរបស់យើង ដើម្បីបន្តធ្វើឲ្យស៊ីជម្រៅ នូវកិច្ចសហប្រតិបត្តិការជាយុទ្ធសាស្ត្រគ្រប់ជ្រុងជ្រោយ ស្តារការធ្វើដំណើរទៅវិញទៅមករបស់ប្រជាពលរដ្ឋ ឲ្យបានឆាប់តាមដែលអាចធ្វើទៅបាន»។

លោក ចាង បានបន្ថែមថា «យើងពោរពេញដោយទំនុកចិត្តថាកិច្ចសហប្រតិបត្តិការចិន-រុស្ស៊ី នឹងទទួលបានការអភិវឌ្ឍធំថ្មីមួយ ហើយគោលដៅនៃការនាំយកពាណិជ្ជកម្មទ្វេភាគីឡើងដល់ ទំហំ២០០ពាន់លានដុល្លារ ដែលកំណត់ដោយប្រមុខរដ្ឋរបស់យើង នឹងសម្រេចឲ្យបានមុនកាលកំណត់»។

គួរបញ្ជាក់ថា ប្រទេសចិនបានបើកព្រំដែនពេញលេញឡើងវិញចាប់តាំងពីថ្ងៃអាទិត្យសប្តាហ៍មុន ក្រោយបិទបញ្ចប់គោលនយោបាយសូន្យ-កូវីដ១៩ របស់ខ្លួន។ កាលពីខែមេសា ទីក្រុងមូស្គូនិងប៉េកាំងបានព្រមព្រៀងគ្នា ក្នុងការបង្កើនទំហំពាណិជ្ជកម្មទ្វេភាគីឡើងដល់ចំនួន ២០០ពាន់លានដុល្លារនៅឆ្នាំ២០២៤៕