(ឡុងដ៍)៖ មន្ត្រីអង្គការសុខភាពពិភពលោក (WHO) បាននិយាយកាលពីថ្ងៃអង្គារថា បណ្តាប្រទេសនានាគួរតែពិចារណាណែនាំអ្នកដំណើរពាក់ម៉ាស់ នៅលើជើងហោះហើរផ្លូវឆ្ងាយដើម្បីទប់ទល់នឹងប្រភេទ Omicron ចុងក្រោយបង្អស់នៃជំងឺកូវីដ១៩ ដែលបានរីករាលដាលយ៉ាងឆាប់រហ័សនៅក្នុងសហរដ្ឋអាមេរិក។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃអង្គារ ទី១០ ខែមករា ឆ្នាំ២០២៣។

មន្ត្រីអង្គការសុខភាពពិភពលោកបាននិយាយ នៅក្នុងសន្និសីទសារព័ត៌មានមួយថា នៅអឺរ៉ុប ទម្រង់បំប្លែងខ្លួនថ្មី XBB.1.5 ត្រូវបានរកឃើញក្នុងចំនួនតិចតួច ប៉ុន្តែកើនឡើងជាប្រចាំ។

មន្ត្រីសង្គ្រោះបន្ទាន់ជាន់ខ្ពស់របស់អង្គការសុខភាពពិភពលោកប្រចាំទ្វីបអឺរ៉ុប លោកស្រី Catherine Smallwood បាននិយាយថា អ្នកដំណើរគួរតែត្រូវបានគេណែនាំឲ្យពាក់ម៉ាស់ នៅក្នុងកន្លែងដែលមានហានិភ័យខ្ពស់ ដូចជាការហោះហើរផ្លូវឆ្ងាយជាដើម ដោយបន្ថែមថា «នេះគួរតែជាការណែនាំដែលចេញដល់ អ្នកដំណើរដែលមកដល់គ្រប់ទីកន្លែងដែលមានជំងឺកូវីដ -១៩»។

មន្ត្រីសុខាភិបាលអាមេរិករូបនេះបាននិយាយថា ទម្រង់ XBB.1.5 ជាប្រភេទរងរបស់ Omicron ដែលអាចឆ្លងបានច្រើនបំផុតដោយត្រូវបានរកឃើញរហូតមកដល់ពេលនេះ មានចំនួន ២៧.៦ភាគរយនៃករណីកូវីដ១៩នៅសហរដ្ឋអាមេរិក។

វានៅតែមិនច្បាស់ថាតើ ទម្រង់បំប្លែងខ្លួន XBB.1.5 នឹងបង្កឱ្យមានរលកនៃការឆ្លងរបស់វានៅជុំវិញពិភពលោកដែរឬទេ។ អ្នក​ជំនាញ​និយាយ​ថា វ៉ាក់សាំង​បច្ចុប្បន្ន​នៅតែអាចការពារ​ពី​រោគ​សញ្ញា​ធ្ងន់ធ្ងរ ការ​សម្រាក​ព្យាបាល​នៅ​មន្ទីរពេទ្យ និង​ការ​ស្លាប់។

លោកស្រី Smallwood បានលើកឡើងទៀតថា «បណ្តាប្រទេសនានាត្រូវពិនិត្យមើលមូលដ្ឋានភស្តុតាង សម្រាប់ការធ្វើតេស្តមុនពេលចេញដំណើរ» ដោយបន្ថែមថា វាជារឿងសំខាន់ដែលមិនត្រូវផ្តោតទាំងស្រុង លើតំបន់ភូមិសាស្ត្រជាក់លាក់ណាមួយឡើយ៕