(វ៉ាស៉ីនតោន)៖ រដ្ឋមន្រ្តីការបរទេសអាមេរិក លោក អាន់តូនី ប្លីងខិន (Antony Blinken) កាលពីថ្ងៃសុក្របានប្រកាសឱ្យដឹងថា សហរដ្ឋអាមេរិក នឹងផ្តល់ជំនួយយោធាបន្ថែមសរុបជាង ៣.៧៥ពាន់លានដុល្លារ ទៅដល់អ៊ុយក្រែនព្រមទាំងប្រទេសអឺរ៉ុបដទៃទៀត ដែលរងការប៉ះពាល់ដោយសារ​សង្រ្គាមឈ្លានពានរបស់រុស្ស៉ី។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសៅរ៍ ទី៧ ខែមករា ឆ្នាំ២០២៣។

វាគឺជាកញ្ចប់ជំនួយយោធាធំបំផុតរបស់ទីក្រុងវ៉ាស៉ីនតោន សម្រាប់ទីក្រុងកៀវគិតមកទល់ពេលនេះ។ ក្នុងនោះ ថវិកា២.៨៥ពាន់លានដុល្លារ គឺជាសព្វាវុធដែលត្រូវដកចេញ ពីក្នុងស្តុករបស់មន្ទីរបញ្ចកោណ ហើយនឹងត្រូវបញ្ជូនទៅកាន់អ៊ុយក្រែនផ្ទាល់តែម្តង ដោយមិនចាំបាច់មាន​ការអនុញ្ញាតពីសភាអាមេរិកឡើយ។ ដោយឡែក ថវិកា២២៥លានដុល្លារទៀត នឹងត្រូវផ្តល់នៅក្រោមកម្មវិធីហិរញ្ញប្បទានយោធាបរទេស ដើម្បីជួយកសាងសមត្ថភាពរយៈពេលវែង និងគាំទ្រដល់ការធ្វើទំនើបកម្ម របស់យោធាអ៊ុយក្រែន។

កញ្ចប់ជំនួយយោធាខាងលើ ក៏រួមបញ្ចូលនូវការផ្តល់ហិរញ្ញប្បទានផ្នែកយោធា ក្នុងថវិកា៦៨២លានដុល្លារ សម្រាប់សម្ព័ន្ធមិត្តនៅអឺរ៉ុបផងដែរ ដើម្បីជំនួសបរិក្ខារយោធានិងសព្វាវុធ ដែលពួកគេបានជួយបរិច្ចាគឱ្យទៅអ៊ុយក្រែន ក៏ដូចជាដើម្បីជំរុញឱ្យមានការបរិច្ចាគបន្ថែមទៀត។

គួរបញ្ជាក់ថា សព្វាវុធក្នុងកញ្ចប់ជំនួយថ្មីរបស់អាមេរិកនោះ រួមមានដូចជារថពាសដែកប្រយុទ្ធ Bradley, កាំភ្លើងធំហោវីតសឺ, រថយន្តការពារ​សម្រាប់​ដឹកកងទ័ព, ប្រព័ន្ធបាញ់គ្រាប់រ៉ុក្កែត, មីស៉ីលបាញ់ពីដីទៅអាកាស, គ្រាប់មីនប្រឆាំងរថពាសដែក, គ្រាប់រំសេវ, និង គ្រាប់មីស៉ីល RIM-7 Sea Sparrow សម្រាប់ការពារដែនអាកាស ជាដើម។ សហរដ្ឋអាមេរិកនិងអាល្លឺម៉ង់ ក៏បានសន្យាបញ្ជូនប្រព័ន្ធខែលការពារមីស៉ីល Patriot ឱ្យទីក្រុងកៀវថែមទៀតផង ដើម្បីជួយទប់ទល់ការវាយប្រហារដោយមីស៉ីលនិងដ្រូនរបស់រុស្ស៉ី៕