(ប្រាស៉ីលីយ៉ា)៖ ប្រភពពីមន្រ្តីប្រេស៉ីលម្នាក់ បានឱ្យដឹងកាលពីថ្ងៃអង្គារថា ប្រធានាធិបតីប្រេស៉ីល លោក ល្វីស អ៉ីណាស៉ីអូ លូឡា ដា ស៉ីលវ៉ា (Luiz Inacio Lula da Silva) នឹងបំពេញទស្សនកិច្ចផ្លូវការលើកដំបូងរបស់លោក ទៅកាន់អាហ្សង់ទីននៅចុងខែមករានេះ មុនការធ្វើទស្សនកិច្ចទៅកាន់សហរដ្ឋអាមេរិក ចិន និងព័រទុយហ្កាល់ ជាបន្តបន្ទាប់ទៀត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃពុធ ទី៤ ខែមករា ឆ្នាំ២០២៣។

លោក លូឡា នឹងចូលរួមក្នុងកិច្ចប្រជុំកំពូលនៃសហគមរដ្ឋតំបន់អាមេរិកឡាទីន និងតំបន់សមុទ្រការីបង់ ហៅកាត់ថា Celac នៅថ្ងៃទី២៣-២៤ ខែមករា ក្នុងរដ្ឋធានីប៊ុយណូស៊ែរនៃប្រទេសអាហ្សង់ទីន។ បន្ទាប់មក មេដឹកនាំប្រេស៉ីលវ័យ៧៧ឆ្នាំរូបនេះ ដែលទើបតែឡើងកាន់តំណែងជាលើកទី៣ កាលពីថ្ងៃអាទិត្យសប្តាហ៍មុន នឹងជួបជាមួយប្រធានាធិបតីអាមេរិក លោក ចូ បៃដិន នៅឯទីក្រុងវ៉ាស៉ីនតោន ក្នុងដំណើរទស្សនកិច្ចមួយ ដែលពុំទាន់កំណត់កាលបរិច្ឆេទច្បាស់លាស់នៅឡើយ។

ចំណែកការបំពេញទស្សនកិច្ចរបស់លោក ទៅកាន់ប្រទេសចិន ដែលជាដៃគូពាណិជ្ជកម្មធំបំផុតរបស់ប្រេស៉ីល នឹងកើតមានឡើងនៅក្រោយខែមីនា។ នាថ្ងៃពុធនេះ ក្រសួងការបរទេសចិនបានចេញមុខ ទទួលស្គាល់ការអញ្ជើញលោក លូឡា ឱ្យទៅធ្វើទស្សនកិច្ច ប៉ុន្តែក៏មិនបានផ្តល់ កាលបរិច្ឆេទជាក់លាក់ដែរ ដោយត្រឹមថាអាចនៅពេលវេលាសមស្របមួយ សម្រាប់ភាគីទាំងពីរ។ មន្រ្តីជាន់ខ្ពស់​ចិន លោក វ៉ាង ឈីសាន (Wang Qishan) បានចូលរួមពិធីស្ប​ថចូលកាន់តំណែងកាលពីថ្ងៃអាទិត្យរបស់លោក លូឡា។

គួរបញ្ជាក់ថា លោក លូឡា ដាស៉ីលវ៉ា ក៏នឹងបំពេញទស្សនកិច្ចទៅកាន់ព័រទុយហ្កាល់ ចាប់ពីថ្ងៃទី២២ ដល់ថ្ងៃទី២៥ ខែមេសាផងដែរ។ លោកធ្លាប់ដឹកនាំប្រទេសប្រេស៉ីល២លើករួចមកហើយ កាលពីចន្លោះឆ្នាំ២០០៣-២០១០៕