(ម៉ានីល)៖ នៅថ្ងៃព្រហស្បតិ៍នេះ អាជ្ញាធរហ្វីលីពីនបានឱ្យដឹងថា មនុស្សម្នាក់ទៀតបានបាត់បង់ជីវិត និង៣នាក់ទៀតបានបាត់ខ្លួន នៅភាគខាងត្បូងប្រទេស បន្ទាប់ពីរងការវាយប្រហារដោយគ្រោះរអិលបាក់ដី។ ប្រការនេះនាំឱ្យតួលេខអ្នកស្លាប់សរុប ដោយសារ​ការធ្លាក់ភ្លៀងប៉ុន្មានថ្ងៃកន្លងទៅ កើនដល់យ៉ាងហោច៣៣នាក់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី២៩ ខែធ្នូ ឆ្នាំ២០២២។

ការស្លាប់ថ្មីចុងក្រោយខាងលើ បានកើតឡើងនៅទីក្រុងម៉ាទី (Mati) លើកោះមិនដាណាវ (Mindanao) នៅពេលគ្រោះរអិបាលបាក់ដី បានវាយប្រហារលើមនុស្ស៤នាក់ ដែលកំពុងស្ទូចត្រីក្រោមមេឃភ្លៀង កាលពីថ្ងៃពុធ។ សាកសពបុរសអាយុ៦២ឆ្នាំម្នាក់ ត្រូវបានរកឃើញ ខណៈមនុស្ស៣នាក់ទៀត នៅមិនទាន់រកឃើញនៅឡើយ។

ទន្ទឹមគ្នានេះ អាជ្ញាធរហ្វីលីពីនក៏កំពុងនៅបន្តតាមស្វែងរក មនុស្សជាង២០នាក់ផ្សេងទៀត ដែលបានបាត់ខ្លួន ក្រោយការធ្លាក់ភ្លៀង​យ៉ាងជោគជាំ កាលពីចុងសប្តាហ៍កន្លងទៅ ដែលបង្កឱ្យមានគ្រោះរអិលបាក់ដីនិងទឹកជំនន់ធ្ងន់ធ្ងរ នៅពាសពេញតំបន់ភាគកណ្តាល​និងភាគខាងត្បូងហ្វីលីពីនផងដែរ។

គួរបញ្ជាក់ថា មិនតែប៉ុណ្ណោះ លំនៅឋានរាប់រយខ្នង បានរងការបំផ្លិចបំផ្លាញ ហើយផលដំណាំលើផ្ទៃដីជាង៥,០០០ហិកតា ត្រូវបានទឹកភ្លៀងហូរនាំយកទៅអស់ ខណៈប្រជាជនហ្វីលីពីនរាប់ម៉ឺននាក់ ត្រូវបានបង្ខំឱ្យជម្លៀសទៅស្នាក់នៅ តាមមណ្ឌលជ្រកកោនបណ្តោះអាសន្ន៕