(កៀវ)៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី នៅថ្ងៃសុក្រនេះបានប្រកាសឱ្យដឹងថា រូបលោកបានត្រឡប់មកដល់​រដ្ឋធានីកៀវរបស់អ៊ុយក្រែនវិញហើយ ក្រោយដំណើរបំពេញទស្សនកិច្ចរបស់លោក ទៅកាន់ទីក្រុងវ៉ាស៉ីនតោននៃសហរដ្ឋអាមេរិក ក្នុងសប្តាហ៍នេះ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី២៣ ខែធ្នូ ឆ្នាំ២០២២។

លោក ហ្សេលេនស្គី បានបង្ហោះឃ្លីបវីដេអូមួយ នៅលើឆាណែលតេឡេក្រាម (Telegram) របស់លោក ដូច្នេះថា «ឥឡូវខ្ញុំកំពុងនៅ ការិយាល័យរបស់ខ្ញុំ ហើយយើងកំពុងប្រឹងប្រែងធ្វើការឆ្ពោះទៅរកជ័យជម្នះ»។ លោកប្រធានាធិបតីអ៊ុយក្រែន បានធ្វើដំណើរទៅ​ដល់រដ្ឋធានីរបស់អាមេរិក កាលពីថ្ងៃពុធ ហើយលោកបានជួបពិភាក្សាជាមួយប្រធានាធិបតីអាមេរិក លោក ចូ បៃដិន ព្រមទាំងបាន​ឡើងថ្លែងសុន្ទរកថា នៅវិមានសភាជាតិអាមេរិក ថែមទៀតផង។ នាឱកាសនោះ សហរដ្ឋអាមេរិក បានប្រកាសកញ្ចប់ជំនួយយោធាថ្មី ទំហំខ្ទង់​ពាន់លានដុល្លារបន្ថែមទៀត សម្រាប់អ៊ុយក្រែន ដែលរួមមានទាំងការផ្តល់ប្រព័ន្ធខែលប្រឆាំងមីស៉ីល ប៉ាទ្រីយ៉ូត (Patriot)។

គួរបញ្ជាក់ថា ដោយឡែកទីក្រុងមូស្គូឯណោះវិញ បានចោទប្រកាន់ទីក្រុងកៀវនិងទីក្រុងវ៉ាស៉ីនតោនថា បានធ្វើមិនដឹងមិនលឺចំពោះ​ការព្រួយបារម្ភរបស់ខ្លួន ហើយកំពុងប្រើប្រាស់អ៊ុយក្រែនជា សមរភូមិដើម្បីធ្វើឱ្យរុស្ស៉ីចុះទន់ខ្សោយ ចំពេលដែលរុស្ស៉ីមានបំណង​ចង់បញ្ចប់ ការប្រយុទ្ធគ្នាឱ្យបានឆាប់រហ័ស៕