(តៃប៉ិ)៖ ក្រសួងការពារជាតិតៃវ៉ាន់បានឱ្យដឹងនៅថ្ងៃព្រហស្បតិ៍នេះថា យោធាតៃវ៉ាន់បានចល័តក្រុមយន្តហោះចម្បាំង ដើម្បីទៅបណ្តេញក្រុមយន្តហោះយោធារបស់ចិនសរុប ៣៩គ្រឿង ដែលបានហោះចូលមកក្នុងតំបន់កំណត់អត្តសញ្ញាណ សម្រាប់ការពារដែនអាកាស ហៅកាត់ថា ADIZ របស់តៃវ៉ាន់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃព្រហស្បតិ៍ ទី២២ ខែធ្នូ ឆ្នាំ២០២២។

ក្នុងរយៈពេល២ឆ្នាំចុងក្រោយនេះ កងទ័ពអាកាសចិនបានធ្វើបេសកកម្មកាន់តែញឹកញាប់ឡើងៗ ជាពិសេសចូលមកក្នុងចំណុចភាគខាងត្បូងនៃតំបន់ ADIZ របស់តៃវ៉ាន់។ យោងតាមរបាយការណ៍របស់ក្រសួងការពារជាតិតៃវ៉ាន់ ដែលរៀបរាប់អំពីសកម្មភាព​របស់យោធាចិន នៅតំបន់ ADIZ របស់ខ្លួន ក្នុងរយៈពេល២៤ម៉ោងចុងក្រោយ គឺការទន្ទ្រានចូលមកនាថ្ងៃព្រហស្បតិ៍នេះ រួមមាន​យន្តហោះចម្បាំងចិន២១គ្រឿង និងយន្តហោះទម្លាក់គ្រាប់បែក H-6 ៤គ្រឿង ព្រមទាំងយន្តហោះផ្សេងទៀត ដូចជាប្រភេទឈ្លបការណ៍និងប្រកាសអាសន្ន ប្រភេទប្រឆាំងនាវាមុជទឹក និងប្រភេទចាក់សាំងលើអាកាស។

មិនតែប៉ុណ្ណោះ តៃវ៉ាន់ក៏បានប្រទះឃើញនាវាយោធាចិន៣គ្រឿង នៅក្បែរដែនកោះរបស់ខ្លួនផងដែរ។ ក្រុមយន្តហោះចម្បាំងតៃវ៉ាន់ ក្នុងចំនួនមិនត្រូវបានបញ្ជាក់ ត្រូវបានបញ្ជូនឡើងលើផ្ទៃអាកាស ដើម្បីព្រមានឱ្យក្រុមយន្តហោះរបស់យោធាចិន ចាកចេញទៅវិញ ខណៈប្រព័ន្ធមីស៉ីលតៃវ៉ាន់ បានឃ្លាំមើលសកម្មភាពយន្តហោះទាំងនោះជាប់។

គួរបញ្ជាក់ថា ប្រទេសជាច្រើនសុទ្ធតែមានតំបន់ ADIZ រៀងៗខ្លួន រួមទាំងសហរដ្ឋអាមេរិក កូរ៉េខាងត្បូង ជប៉ុន និងចិន ហើយវាខុសគ្នា​ពីតំបន់ដែនអាកាសអធិបតេយ្យ។ តំបន់ ADIZ លាតសន្ធឹងហួសពីតំបន់ដែនអាកាស ដើម្បីឱ្យយន្តហោះបរទេសដែលចូលមកក្នុង​តំបន់នេះ អាចប្រកាសពីអត្តសញ្ញាណរបស់ខ្លួនប្រាប់ដល់ អាជ្ញាធរអាកាសចរណ៍ប្រចាំតំបន់។ សម្រាប់តំបន់ ADIZ របស់តៃវ៉ាន់ គឺមានទំហំ​ធំឆ្ងាយជាង ដែនអាកាសផ្ទាល់របស់តៃវ៉ាន់ ហើយនៅកន្លែងខ្លះវាជាន់គ្នាជាមួយតំបន់ ADIZ របស់ចិន ហើយថែមទាំងរាប់បញ្ចូល​ដែនអាកាសរបស់ចិន តែម្តងទៀតផង៕