(មីនស្កិ៍)៖ កាលពីថ្ងៃចន្ទសប្តាហ៍នេះ ប្រធានាធិបតីបេឡារុស លោក អាឡិចសាន់ដឺ លូកាសិនកូ (Alexander Lukashenko) បានប្រកាសថា បេឡារុសបានដាក់ពង្រាយរួចរាល់ហើយ នូវប្រព័ន្ធមីស៉ីលការពារដែនអាកាស S-400 និងប្រព័ន្ធបាញ់មីស៉ីលបាលិស្ទីគ អ៉ីស្កាន់ដឺ (Iskander)។ នេះបើតាមការចេញផ្សាយដោយ ទីភ្នាក់ងារព័ត៌មាន TASS នៅថ្ងៃអង្គារ ទី២០ ខែធ្នូ ឆ្នាំ២០២២។

លោកប្រធានាធិបតីបេឡារុស បានថ្លែងឱ្យដឹងដូចខាងលើប្រាប់ក្រុមអ្នកសារព័ត៌មាន បន្ទាប់ពីលោកបានទទួលជួបពិភាក្សាជាមួយ ប្រធានាធិបតីរុស្ស៉ី លោក វ៉្លាឌីមៀ ពូទីន ដែលបានមកបំពេញទស្សនកិច្ចនៅទីក្រុងមីនស្កិ៍។ លោក លូកាសិនកូ បានប្រាប់ដូច្នេះថា «ថ្ងៃនេះ យើងបានដាក់ពង្រាយប្រព័ន្ធ S-400 ហើយអ្វីដែលសំខាន់បំផុតនោះគឺ ប្រព័ន្ធ Iskander ដែលអ្នកបានប្រគល់មកឱ្យយើង ដូចអ្វីដែលអ្នកបានសន្យាកាលពី៦ខែមុន»។ បេឡារុសបានប្រកាសអំពីការទិញ S-400 និង Iskander ពីរុស្ស៉ី កាលពីខែឧសភា។

លោក លូកាសិនកូ បានបន្តថា ខណៈនេះបេឡារុសក៏កំពុងហ្វឹកហាត់ ក្រុមសហសេវិកសម្រាប់យន្តហោះ ដែលមានផ្ទុកគ្រាប់បែកនុយក្លេអ៊ែរ ក្រោមការជួយជ្រោមជ្រែងពីរុស្ស៉ីថែមទៀតផង។ មេដឹកនាំបេឡារុសរូបនេះ បានអះអាងថា ការដាក់ពង្រាយអាវុធទាំងនេះ មិនមែនជាការគំរាមចំពោះអ្នកណាម្នាក់ទេ ប៉ុន្តែគឺដើម្បីធានាសន្តិសុខរបស់បេឡារុសផ្ទាល់។

គួរបញ្ជាក់ថា ទស្សនកិច្ចខាងលើ គឺជាដំណើរទស្សនកិច្ចដំបូងបំផុត របស់លោក ពូទីន ទៅកាន់ប្រទេសបេឡារុស គិតចាប់តាំងពី​ឆ្នាំ២០១៩មក។ អ្នកនាំពាក្យវិមានក្រឹមឡាំង លោក ឌីមីទ្រី ប៉េស្កូវ (Dmitry Peskov) ក៏បានចេញមុខច្រានចោលផងដែរចំពោះ ទស្សនៈដែលថាលោក ពូទីន បំពេញទស្សនកិច្ចទៅកាន់បេឡារុស ដើម្បីជំរុញឱ្យទីក្រុងមីនស្កិ៍ ចូលរួមក្នុងសង្រ្គាមរបស់ខ្លួន នៅអ៊ុយក្រែន។ កំលុងការចាប់ផ្តើមសង្រ្គាមដំបូង ទីក្រុងមូស្គូបានប្រើប្រាស់ទឹកដីបេឡារុស ជាមូលដ្ឋានសម្រាប់ខ្លួនចល័តកងទ័ព យន្តហោះ និងសព្វាវុធ ចូលឈ្លានពានភាគខាងជើងអ៊ុយក្រែន៕