(រ៉ូម)៖ នាយករដ្ឋមន្រ្តីអ៉ីតាលី លោកស្រី ចចជៀ ម៉េឡូនី (Giorgia Meloni) បាននិយាយនៅថ្ងៃអង្គារសប្តាហ៍នេះថា សហភាពអឺរ៉ុប (EU) ត្រូវតែធ្វើការបន្ថែមទៀតដើម្បីការពារព្រំដែន និងបញ្ឈប់លំហូរជនចំណាកស្រុកពីតំបន់អាហ្វ្រិកខាងជើង។ នេះបើយោងតាមការដកស្រង់ផ្សាយពីទីភ្នាក់ងារសារព័ត៌មាន AFP នៅថ្ងៃពុធ ទី១៤ ខែធ្នូ ឆ្នាំ២០២២។

ថ្លែងទៅកាន់សភាអ៉ីតាលីមុនកិច្ចប្រជុំកំពូលសភាពអឺរ៉ុប ក្នុងសប្តាហ៍នេះ លោកស្រី ម៉េឡូនី បាននិយាយថា អ៉ីតាលីដែលមានការប្តេជ្ញាគូសបន្ទាត់ដ៏តឹងរ៉ឹងលើបញ្ហាអន្តោប្រវេសន៍នោះ បានចាប់ជនចំណាកស្រុករហូតដល់ ៥០០នាក់ ចេញពីកប៉ាល់សប្បុរសធម៌២គ្រឿង ដែលបានអនុញ្ញាតឲ្យចូលចតក្នុងប្រទេស។ ក្រោយមកនៅក្នុងការជជែកដេញដោល លោកស្រី ម៉េឡូនី បានសង្កត់ធ្ងន់ថា គោលនយោបាយផ្លាស់ទីលំនៅរបស់ EU សម្រាប់ជនចំណាកស្រុក គឺមិនសមស្របសម្រាប់អ៊ីតាលី ដែលជាបន្ទុកធ្ងន់ពេក។

លោកស្រី ម៉េឡូនី បានគូសបញ្ជាក់ថា «ខ្ញុំគិតថាវាមិនមែនជាដំណោះស្រាយទេដែលថា មានអ៉ីតាលីមួយគត់ ដែលត្រូវបានប្រើប្រាស់ជាច្រកផ្លូវចេញពីសហភាពអឺរ៉ុប ដើម្បីទទួលឲ្យជនភៀសខ្លួនជាង ១០០,០០០នាក់ ឆ្លងកាត់ចូលទៅកាន់ប្រទេសចំនួន ៣០ផ្សេងទៀត។ រដ្ឋសហភាពអឺរ៉ុបផ្សេងទៀត ក៏គួរតែមានសម្ពាធពីការទទួល យកជនចំណាកស្រុក តាមរយៈប្រទេសដ៏ទៃ​ដែរ។

គួរបញ្ជាក់ថា បើតាមទិន្នន័យរបស់ក្រសួងមហាផ្ទៃអ៉ីតាលី ជនចំណាកស្រុកជាង ៩៨,០០០នាក់ បានមកដល់ប្រទេសអ៊ីតាលីតាមច្រកសមុទ្រក្នុងឆ្នាំ២០២២ កើនឡើងពីចំនួនប្រហែល ៦៣,០០០នាក់ក្នុងរយៈពេលដូចគ្នានៃឆ្នាំ២០២១៕