(អ៊ីស្លាម៉ាបាដ)៖ ធនាគារអភិវឌ្ឍន៍អាស៊ី (ADB) បានអនុម័តលើកញ្ចប់ហិរញ្ញប្បទាន ៥៥៤លានដុល្លារអាមេរិក ដើម្បីគាំទ្រដល់កិច្ចខិតខំប្រឹងប្រែងស្តារ និងកសាងឡើងវិញនៅក្នុងប្រទេសប៉ាគីស្ថាន បន្ទាប់ពីគ្រោះទឹកជំនន់ដ៏បំផ្លិចបំផ្លាញក្នុងឆ្នាំនេះ ក៏ដូចជាពង្រឹងគ្រោះមហន្តរាយ និងភាពធន់នឹងអាកាសធាតុរបស់ប្រទេស។ នេះបើយោងតាមការចេញផ្សាយដោយ សារព័ត៌មានស៊ីនហួរ នៅថ្ងៃចន្ទ ទី១២ ខែធ្នូ ឆ្នាំ២០២២។

ADB បាននិយាយនៅក្នុងសេចក្តីថ្លែងការណ៍មួយនៅថ្ងៃចន្ទនេះថា ការផ្តល់ហិរញ្ញប្បទាននឹងគាំទ្រដល់ការស្តារប្រព័ន្ធធារាសាស្រ្ត ការបង្ហូរទឹក ការគ្រប់គ្រងហានិភ័យទឹកជំនន់ ការគ្រប់គ្រងទឹកនៅកសិដ្ឋាន និងហេដ្ឋារចនាសម្ព័ន្ធដឹកជញ្ជូននៅក្នុងតំបន់ Balochistan ភាគនិរតីនៃប្រទេសប៉ាគីស្ថាន ដែលរងផលប៉ះពាល់ដោយទឹកជំនន់យ៉ាងធ្ងន់ធ្ងរ។

ធនាគារអភិវឌ្ឍន៍អាស៊ីបានឲ្យដឹងទៀតថា គម្រោងជំនួយទឹកជំនន់បន្ទាន់របស់ខ្លួន ក៏នឹងរួមបញ្ចូលផងដែរ នូវវិធានការទប់ទល់នឹងអាកាសធាតុ និងគ្រោះមហន្តរាយនៅក្នុងការរចនាហេដ្ឋារចនាសម្ព័ន្ធ ដោយបន្ថែមថា ខ្លួនបានផ្លាស់ប្តូរទីតាំងប្រាក់កម្ចីដែលមានស្រាប់បន្ថែមចំនួន ៧១លានដុល្លារអាមេរិក ដើម្បីគាំទ្រដល់កិច្ចខិតខំប្រឹងប្រែង ឆ្លើយតបនឹងទឹកជំនន់របស់រដ្ឋាភិបាលផងដែរ។

គួរបញ្ជាក់ថា បន្ទាប់ពីរលកកំដៅដែលមិនធ្លាប់មានពីមុនមកកាលពីដើមឆ្នាំនេះ ប្រទេសប៉ាគីស្ថានបានទទួលរងនូវភ្លៀងមូសុងរយៈពេលយូរ និងធ្ងន់ធ្ងរ ដែលនាំឱ្យមានទឹកជំនន់ដ៏អាក្រក់បំផុតក្នុងរយៈពេលមួយសតវត្ស នៅក្នុងប្រទេសអាស៊ីខាងត្បូងមួយនេះ៕