(សិង្ហបុរី)៖ មន្រ្តីអាមេរិកម្នាក់បានបង្ហើបឱ្យដឹងនៅថ្ងៃចន្ទនេះថា រុស្ស៉ីនឹងទទួលបានការអញ្ជើញឱ្យចូលរួម ក្នុងកិច្ចប្រជុំផ្សេងៗរបស់ អង្គការកិច្ចសហប្រតិបត្តិការសេដ្ឋកិច្ចអាស៉ី-ប៉ាស៉ីហ្វិក ហៅកាត់ APEC ដែលរៀបចំឡើងនៅសហរដ្ឋអាមេរិក ក្នុងឆ្នាំ២០២៣។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃចន្ទ ទី១២ ខែធ្នូ ឆ្នាំ២០២២។

ថ្លែងប្រាប់ក្រុមអ្នកសារព័ត៌មាននៅប្រទេសសិង្ហបុរី មន្រ្តីជាន់ខ្ពស់អាមេរិកខាងលើ ដែលទទួលបន្ទុកកិច្ចសហប្រតិបត្តិការ APEC គឺលោក ម៉ាត មូរេ (Matt Murray) បាននិយាយថា ក្នុងនាមជាម្ចាស់ផ្ទះល្អសម្រាប់កិច្ចប្រជុំ APEC សហរដ្ឋអាមេរិកនឹងអញ្ជើញរុស្ស៉ី ដ្បិតរុស្ស៉ី​ក៏ជាសមាជិកមួយដែរ នៃប្លុកដែលមាន២១ប្រទេសនេះ។

កំលុងកិច្ចប្រជុំមួយរបស់ APEC ដែលរៀបចំឡើងនៅប្រទេសថៃ កាលពីខែឧសភា ក្រុមអ្នកតំណាងមកពីសហរដ្ឋអាមេរិក រួមទាំង​ប្រទេសមួយចំនួនទៀតបាននាំគ្នាដើរចេញ នៅពេលរដ្ឋមន្រ្តីសេដ្ឋកិច្ចរុស្ស៉ីដល់វេនថ្លែងសុន្ទរកថា ដើម្បីសម្តែងការតវ៉ាចំពោះទង្វើ​របស់ទីក្រុងមូស្គូនៅអ៊ុយក្រែន។

មិនតែប៉ុណ្ណោះ ប្រធានាធិបតីរុស្ស៉ី លោក វ៉្លាឌីមៀ ពូទីន ក៏មិនបានមកចូលរួមកិច្ចប្រជុំកំពូល នៃថ្នាក់ដឹកនាំក្រុមប្រទេស G20 នៅឯកោះបាលី​នៃប្រទេសឥណ្ឌូណេស៉ី កាលពីឆ្នាំមុនផងដែរ បើទោះបីជាមានការអញ្ជើញពីទីក្រុងហ្សាការតា ដែលជាម្ចាស់ផ្ទះក៏ដោយ។ លោក មូរេ មិនបាននិយាយទេថា តើលោក ពូទីន នឹងអញ្ជើញចូលរួមកិច្ចប្រជុំថ្នាក់ដឹកនាំ APEC ឆ្នាំក្រោយ នៅឯទីក្រុងសាន់ហ្រ្វាន់ស៉ីស្កូ ដែរឬយ៉ាងណា។ កំលុងកិច្ចប្រជុំកំពូល APEC ដែលថៃធ្វើជាម្ចាស់ផ្ទះកាលពីខែវិច្ឆិកា គឺលោក ពូទីន ត្រូវបានតំណាងដោយ ឧបនាយករដ្ឋមន្រ្តីទីមួយរុស្ស៉ី លោក អាន់ដ្រេ បេលូសូវ (Andrei Belousov)។

គួរបញ្ជាក់ថា ទំនាក់ទំនងរវាងទីក្រុងវ៉ាស៉ីនតោននិងទីក្រុងមូស្គូ បានធ្លាក់ចុះដាបដល់កម្រិតអាក្រក់ជាទីបំផុត ក្នុងរយៈពេល៦០ឆ្នាំ​មកនេះ ចាប់តាំងតែពីរុស្ស៉ីបានបើកការឈ្លានពានលើអ៊ុយក្រែន កាលពីខែកុម្ភៈ៕