(វ៉ាស៉ីនតោន)៖ សហរដ្ឋអាមេរិក កូរ៉េខាងត្បូង និងជប៉ុន ទើបតែប្រកាសដាក់ទណ្ឌកម្មថ្មីបន្ថែមទៀត ទៅលើក្រុមមន្រ្តីកូរ៉េខាងជើង ដែលជាប់ពាក់ព័ន្ធនៅក្នុង កម្មវិធីមីស៉ីល-នុយក្លេអ៊ែររបស់ទីក្រុងព្យុងយ៉ាង បន្ទាប់ពីការធ្វើតេស្តមីស៉ីលបាលិស្ទីគអន្តរទ្វីប ឬ ICBM កាលពីខែវិច្ឆិកាកន្លងទៅ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ​ ទី២ ខែធ្នូ ឆ្នាំ២០២២។

ក្រសួងហិរញ្ញវត្ថុអាមេរិកកាលពីថ្ងៃព្រហស្បតិ៍ បានឱ្យដឹងថា ក្រុមមន្រ្តីកូរ៉េខាងជើងទាំងនោះ រួមមានឈ្មោះដូចជា ចុន អ៉ីលហូ (Jon Il Ho), យូ ជីន (Yu Jin) និងគីម ស៊ូហ្គីល (Kim Su Gil) ដែលសុទ្ធតែត្រូវបានសហភាពអឺរ៉ុប (EU) កំណត់គោលដៅដាក់ទណ្ឌកម្ម កាលពីខែមេសា ឆ្នាំនេះ។

ចំណែកក្រសួងការបរទេសកូរ៉េខាងត្បូង បានប្រកាសដាក់ទណ្ឌកម្មទៅលើ បុគ្គល៧នាក់ផ្សេងទៀត ដែលរួមមានទាំងជនជាតិ​សិង្ហបុរីម្នាក់ និងជនជាតិតៃវ៉ាន់ម្នាក់ ហើយនិងស្ថាប័នចំនួន៨។ បុគ្គលនិងអង្គភាពទាំងនេះ សុទ្ធតែស្ថិតក្រោមទណ្ឌកម្មរួចស្រេច របស់សហរដ្ឋអាមេរិក ដែលបានដាក់កាលពីចន្លោះខែមករា ឆ្នាំ២០១៨ និងខែតុលា ឆ្នាំ២០២២។

រីឯក្រសួងការបរទេសជប៉ុនវិញ បានប្រកាសថាទីក្រុងតូក្យូក៏បានកំណត់គោលដៅលើ អង្គភាពចំនួន៣ ព្រមទាំងបុគ្គលម្នាក់ផងដែរ សម្រាប់ការដាក់ទណ្ឌកម្មថ្មីរបស់ខ្លួន ដោយក្នុងនោះរួមមានទាំងក្រុម ឡាហ្សារ៉ឺស (Lazarus Group) ដែលជាប់សង្ស័យក្នុងការធ្វើសកម្មភាព​វាយប្រហារតាមប្រព័ន្ធព័ត៌មានវិទ្យា។ ក្រុមនេះត្រូវគេស្គាល់ថា ជាក្រុមហែគឃ័រ (Hacker) របស់រដ្ឋាភិបាលកូរ៉េខាងជើង។

កាលពីពេលកន្លងទៅនេះ ចិននិងរុស្ស៉ីបានរារាំងកិច្ចប្រឹងប្រែង ដើម្បីដាក់ទណ្ឌកម្មបន្ថែមតាមរយៈ ក្រុមប្រឹក្សាសន្តិសុខរបស់ UN ដោយលើកហេតុផលថា ការដាក់ទណ្ឌកម្មអន្តរជាតិគួរតែត្រូវបន្ធូរបន្ថយ ដើម្បីស្តារកិច្ចចរចាឡើងវិញ និងបញ្ចៀសផលប៉ះពាល់កាន់តែ​ធ្ងន់ធ្ងរ ផ្នែកមនុស្សធម៌។ ប្រការនេះបានបង្ខំឱ្យទីក្រុងវ៉ាស៉ីនតោន ងាកទៅផ្តោតលើកិច្ចសហការត្រីភាគី ជាមួយកូរ៉េខាងត្បូងនិងជប៉ុន ក៏ដូចជាជាមួយដៃគូអឺរ៉ុប។

គួរបញ្ជាក់ថា ការប្រកាសកញ្ចប់ទណ្ឌកម្មថ្មីខាងលើគឺធ្វើឡើង បន្ទាប់ពីមានការបាញ់សាកល្បងមីស៉ីល ICBM មួយគ្រាប់ដោយកូរ៉េខាងជើង កាលពីថ្ងៃទី១៨ ខែវិច្ឆិកា ដែលជាផ្នែកនៃការបាញ់តេស្តមីស៉ីលច្រើនមិនធ្លាប់មាន នៅក្នុងឆ្នាំនេះ ហើយចំគ្រាដែលការព្រួយបារម្ភនៅតែបន្ត ជុំវិញលទ្ធភាពនៃការធ្វើតេស្តបំផ្ទុះ អាវុធនុយក្លេអ៊ែរឡើងវិញក្នុងពេលឆាប់ៗ ដោយទីក្រុងព្យុងយ៉ាង ក្រោយផ្អាកតាំងតែពីឆ្នាំ២០១៧មក៕