(បាងកក)៖ អាជ្ញាធរមន្ត្រីប៉ូលិសបាននិយាយថា យ៉ាងហោចណាស់មនុស្សម្នាក់បានស្លាប់បាត់បង់ជីវិត នៅពេលដែលគ្រាប់បែកក្នុងរថយន្តមួយ បានផ្ទុះនៅខាងក្នុងបរិវេណប៉ូលីសមួយកន្លែងនៅភាគខាងត្បូងប្រទេសថៃនៅថ្ងៃអង្គារនេះ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃអង្គារ ទី២២ ខែវិច្ឆិកា ឆ្នាំ២០២២។
លោកវរសេនីយ៍ទោ Nitti Soksan ស្នងការរងនគរបាលខេត្ត Narathiwat មានប្រសាសន៍ថា «វាជាការបំផ្ទុះរថយន្ត។ យើងកំពុងបោសសម្អាតតំបន់នោះ ហើយចំនួនអ្នករបួសអាចនឹងកើនឡើង»។
លោក Pornprasit Jantra ប្រធានមន្ទីរពេទ្យ Narathiwat Rajanagarindra បាននិយាយថា យ៉ាងហោចណាស់មនុស្ស ២៩នាក់ត្រូវបានបញ្ជូនមកព្យាបាលនៅមន្ទីរពេទ្យរបស់លោក ក្នុងចំណោមពួកគេមានទាំងមន្ត្រីប៉ូលីស និងជនស៊ីវិល។
ទោះជាយ៉ាងណា រហូតមកទល់ពេលនេះ គ្មាននរណាម្នាក់ចេញមុខអះអាងទទួលខុសត្រូវចំពោះការវាយប្រហារនេះទេ។
គួរបញ្ជាក់ថា ការបំផ្ទុះ និងអគ្គីភ័យបានឆាបឆេះយ៉ាងតិច ១៧កន្លែងនៅភាគខាងត្បូងប្រទេសថៃក្នុងខែសីហា ដែលទំនងជាការវាយប្រហារចម្រុះគ្នា ដែលបានបណ្តាលឲ្យមនុស្ស ០៧នាក់រងរបួស។
មនុស្សជាង ៧,៣០០នាក់ត្រូវបានសម្លាប់នៅក្នុងជម្លោះចាប់តាំងពីឆ្នាំ២០០៣ នេះបើយោងតាម Southern Deep Watch ដែលឃ្លាំមើលអំពើហិង្សានេះ។ ការចរចាសន្តិភាពដែលបានចាប់ផ្តើមក្នុងឆ្នាំ ២០១៣ បានជាប់គាំងជាបន្តបន្ទាប់៕
