(ញូដេលី)៖ នៅថ្ងៃសុក្រនេះ ឥណ្ឌាទើបតែបានទទួលជោគជ័យ ក្នុងការបាញ់បង្ហោះគ្រាប់រ៉ុក្កែតដំបូងបំផុត ដែលអភិវឌ្ឍឡើងដោយ​ក្រុមហ៊ុនឯកជន។ ជោគជ័យនេះគឺជាសមិទ្ធផលដ៏សំខាន់មួយ ក្នុងកិច្ចប្រឹងប្រែងរបស់ប្រទេសឥណ្ឌា ដែលកំពុងព្យាយាមបង្កើតនូវ ឧស្សាហកម្មអវកាសពាណិជ្ជកម្មមួយ និងដើម្បីប្រកួតប្រជែងខាងតម្លៃ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី១៨ ខែវិច្ឆិកា ឆ្នាំ២០២២។

គ្រាប់រ៉ុក្កែតអវកាសខាងលើ ដែលមានឈ្មោះថា វីក្រាម-អេស (Vikram-S) មានទម្ងន់៥៤៥គីឡូក្រាម និងត្រូវបានអភិវឌ្ឍឡើងដោយ​ក្រុមហ៊ុនអវកាសឯកជន ដែលទើបបង្កើតថ្មីឈ្មោះ Skyroot។ វាត្រូវបានបាញ់បង្ហោះឡើង ចេញពីមូលដ្ឋានបង្ហោះគ្រាប់រ៉ុក្កែតរបស់​ទីភ្នាក់ងារអវកាសឥណ្ឌា ដែលស្ថិតនៅក្បែរទីក្រុងចិនណៃ (Chennai) ហើយបានហោះឡើងដល់រយៈកម្ពស់ ៨៩.៥គីឡូម៉ែត្រ។

រ៉ុក្កែត Vikram-S មានសមត្ថភាពហោះក្នុងល្បឿន Mach-5 គឺស្មើនឹងល្បឿនសំឡេង៥ដង ហើយផ្ទុកសម្ភារបានទម្ងន់សរុប៨៣គីឡូក្រាម ឡើងទៅដល់រយៈពេល១០០គីឡូម៉ែត្រ។ តាមពិតទៅ ក្រុមការងាររបស់ Skyroot បានកំណត់រយៈកម្ពស់ត្រឹមតែ ៨០គីឡូម៉ែត្រប៉ុណ្ណោះ ជាគោលដៅសម្រាប់ការបង្ហោះធ្វើតេស្តដំបូង ព្រោះវាជារយៈកម្ពស់គោល ដែលទីភ្នាក់ងារអវកាសមួយចំនួន ចាត់ទុកជាព្រំប្រទល់រវាងទីអវកាស ហើយនិងស្រទាប់បរិយាកាសរបស់ភពផែនដី។ ដោយឡែក បើយោងតាមស្តង់ដាអន្តរជាតិវិញ ខ្សែបន្ទាត់កាម៉ាន់ (Karman Line) ឯណោះទេ ដែលស្ថិតនៅរយៈកម្ពស់ ១០០គីឡូម៉ែត្រពីផ្ទៃផែនដី ទើបត្រូវបានចាត់ទុកជា កន្លែងខណ្ឌចែកជាមួយលំហអវកាស។

គួរបញ្ជាក់ថា មកទល់បច្ចុប្បន្ន ទីភ្នាក់ងារអវកាសរដ្ឋ ISRO គឺជាអ្នកកាន់កាប់ផ្តាច់មុខតែឯង ក្នុងការបាញ់បង្ហោះគ្រាប់រ៉ុក្កែត នៅក្នុង​ប្រទេសឥណ្ឌា។ សព្វថ្ងៃរដ្ឋាភិបាលឥណ្ឌា បាននិងកំពុងប្រឹងប្រែងជំរុញឧស្សាហកម្មអវកាសឯកជន ដើម្បីជួយបំពេញបន្ថែមចំពោះ​កម្មវិធីអវកាសរដ្ឋរបស់ខ្លួន។​ ក្រុមហ៊ុន Skyroot បានដាក់គោលដៅកាត់បន្ថយការចំណាយ លើការអភិវឌ្ឍឱ្យបានរហូតដល់៩០ភាគរយ ធៀបនឹងមធ្យោបាយដែលមានស្រាប់ សម្រាប់ការបញ្ជូនផ្កាយរណបខ្នាតតូចឡើងទៅទីអវកាស៕