(ហ្សឺណេវ)៖ អគ្គលេខាធិការអង្គការសហប្រជាជាតិ លោក Antonio Guterres នៅថ្ងៃចន្ទនេះបានព្រមានថា ភពផែនដីកំពុងស្ថិតនៅលើ «ផ្លូវហាយវេឆ្ពោះទៅកាន់ឋាននរកអាកាសធាតុ» ខណៈដែលកិច្ចប្រជុំកំពូលស្តីអំពីការបំប្រែបម្រួលអាកាសធាតុ របស់មេដឹកនាំពិភពលោក​​​​​ បានចាប់ផ្តើមនៅប្រទេសអេហ្ស៊ីប។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន AFP នៅថ្ងៃចន្ទ ទី០៧ ខែវិច្ឆិកា ឆ្នាំ២០២២។

ភាសាស្រពិចស្រពិលរបស់លោក Guterres នៅតែជាការអំពាវនាវមួយទៀត សម្រាប់សកម្មភាពបន្ទាន់ បន្ទាប់ពីមួយឆ្នាំនៃគ្រោះមហន្តរាយដែលជំរុញ ដោយអាកាសធាតុមិនធ្លាប់មាននៅទូទាំងពិភពលោក និងកង្វះវឌ្ឍនភាពលើការកាត់បន្ថយការបំភាយឧស្ម័ន ឬការផ្តល់ជំនួយហិរញ្ញវត្ថុដល់ប្រទេសក្រីក្រ។

លោកបាននិយាយនៅឯកិច្ចប្រជុំកំពូលថា «យើង​ស្ថិត​ក្នុង​ការ​តស៊ូ​ដើម្បី​ជីវិត​របស់​យើង ហើយ​យើង​កំពុង​តែ​ចាញ់។ ការបំភាយឧស្ម័នផ្ទះកញ្ចក់បន្តកើនឡើង។ សីតុណ្ហភាពសកលនៅតែបន្តកើនឡើង។ ហើយ​ភពផែនដី​របស់​យើង​កំពុង​ខិត​ជិត​ដល់​ចំណុច​បញ្ចប់ ដែល​នឹង​ធ្វើ​ឱ្យ​ភាព​ចលាចល​ នៃ​អាកាសធាតុ​មិន​អាច​ត្រឡប់​ថយ​ក្រោយ​វិញ​បាន»។

អគ្គលេខាធិការអង្គការសហប្រជាជាតិរូបនេះ បានអំពាវនាវឱ្យមានកតិកាសញ្ញាសាមគ្គីភាពអាកាសធាតុ «ជាប្រវត្តិសាស្ត្រ» រវាងប្រទេសអភិវឌ្ឍន៍ និងប្រទេសកំពុងអភិវឌ្ឍន៍ ដោយប្រទេសទាំងអស់ត្រូវខិតខំប្រឹងប្រែងបន្ថែមទៀត ដើម្បីកាត់បន្ថយការបំភាយឧស្ម័ននៅទសវត្សរ៍នេះ ស្របតាមគោលដៅកំណត់ការឡើងកំដៅដល់ ១.៥អង្សាសេ»។

គួរបញ្ជាក់ថា COP27 ដែលត្រូវបានប្រារព្ធឡើងនៅឯទីក្រុងរមណីយដ្ឋានឆ្នេរ Sharm el-Sheikh នៃប្រទេសអេហ្ស៊ីប ត្រូវបានគេរាប់ជាកិច្ចប្រជុំកំពូលនៃការអនុវត្ត ដែលភាគីនានាត្រូវបានលើកទឹកចិត្តឱ្យចេញមុខ ជាមួយនឹងវិធានការ និងសកម្មភាពជាក់ស្តែង ដើម្បីបំពេញការសន្យាកន្លងមក៕