(ព្យុងយ៉ាង)៖ ទីភ្នាក់ងារព័ត៌មានរដ្ឋកូរ៉េខាងជើង KCNA នាថ្ងៃចន្ទនេះ បានចេញមុខរាយការណ៍ថា យោធាកូរ៉េខាងជើងនឹងបន្តធ្វើសកម្មភាព ឆ្លើយតបដោយភាពម៉ឺងម៉ាត់និងខ្លាំងក្លាជានិច្ច ចំពោះសមយុទ្ធយោធានានារបស់កូរ៉េខាងត្បូង និងសហរដ្ឋអាមេរិក។ នេះបើតាមការចេញ​ផ្សាយដោយ ទីភ្នាក់ងារព័ត៌មាន AFP នៅថ្ងៃចន្ទ ទី៧ ខែវិច្ឆិកា ឆ្នាំ២០២២។

យោងតាម KCNA យោធាកូរ៉េខាងជើងបានព្រមានដូច្នេះថា «កងកម្លាំងកូរ៉េខាងជើង នឹងបន្តឆ្លើយតបចំពោះសមយុទ្ធត្រៀមធ្វើសង្រ្គាម របស់សត្រូវប្រឆាំងនឹងប្រទេសកូរ៉េខាងជើង ជាមួយសកម្មភាពយោធាជាក់ស្តែង ដែលមានភាពម៉ឺងម៉ាត់និងខ្លាំងក្លាលើសលប់ជានិច្ច។ ដរាបណាសត្រូវរបស់យើង នៅតែធ្វើសកម្មភាពយោធាបង្កហេតុផ្សេងៗ នោះពួកយើងក៏នឹងនៅតែបន្តឆ្លើយតបទៅកាន់ពួកគេវិញ ដោយគ្មានខ្លាច​រអាអ្វីដែរ»។

យោធាកូរ៉េខាងជើង បានសង្កត់ធ្ងន់ទៀតថា ការធ្វើតេស្តបាញ់មីស៉ីលជាបន្តបន្ទាប់ កាលពីសប្តាហ៍កន្លងទៅ គឺជាចម្លើយយ៉ាងច្បាស់មួយ ចំពោះសមយុទ្ធយោធារួមគ្នា រវាងកូរ៉េខាងត្បូងនិងអាមេរិក នាពេលនោះ។ ជាមួយគ្នានេះ ទីភ្នាក់ងារព័ត៌មាន KCNA ក៏បានបញ្ចេញរូបភាព​មួយចំនួន បង្ហាញពីទិដ្ឋភាពនៃការបាញ់មីស៉ីលចម្រុះប្រភេទ របស់កូរ៉េខាងជើង កាលពីចន្លោះថ្ងៃទី២-៥ ខែវិច្ឆិកាផងដែរ។

គួរបញ្ជាក់ថា យន្តហោះយោធាកូរ៉េខាងត្បូងនិងអាមេរិក សរុបប្រមាណជា២៤០គ្រឿង ក្នុងនោះរួមមានទាំងយន្តហោះចម្បាំង F-35 និងយន្តហោះទម្លាក់គ្រាប់បែក B-1B បានចូលរួមក្នុងសមយុទ្ធទ័ពអាកាសធំបំផុត មិនធ្លាប់មានរបស់សម្ព័ន្ធមិត្តទាំងពីរ ហៅថា វីជីលែន ស្តូម (Vigilant Storm) ដែលបានប្រព្រឹត្តទៅចាប់ពីថ្ងៃទី៣១ ដល់ថ្ងៃទី៥ ខែវិច្ឆិកា។ សមយុទ្ធយោធារួមគ្នារវាងកូរ៉េខាងត្បូងនិងអាមេរិក តែងតែទទួលរងការបញ្ចេញប្រតិកម្មខ្លាំងៗជានិច្ច ពីសំណាក់ទីក្រុងព្យុងយ៉ាង ដែលចាត់ទុកពួកវាថាជា ការហាត់សមដើម្បីឈ្លានពានខ្លួន៕