(អ៉ីស្តង់ប៊ុល)៖ អ្នកនាំពាក្យរបស់ប្រធានាធិបតីតួកគី លោក តាយីប អឺដូហ្កាន់ (Tayyip Erdogan) បាននិយាយថា និតិវិធីអនុម័ត ការលក់យន្តហោះចម្បាំង F-16 របស់សហរដ្ឋអាមេរិក មកឱ្យប្រទេសតួកគី កំពុងប្រព្រឹត្តទៅយ៉ាងប្រសើរ ហើយអាចនឹងចប់​រួចរាល់ជាស្ថាពរ ក្នុងពេលប៉ុន្មានខែទៀត។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃសុក្រ ទី៤ ខែតុលា ឆ្នាំ២០២២។

អ្នកនាំពាក្យខាងលើគឺលោក អ៉ីប្រាហ៉ីម កាលីន (Ibrahim Kalin) បាននិយាយក្នុងបទសម្ភាសន៍មួយជាមួយ សារព័ត៌មាន CNN Turk កាលពីថ្ងៃព្រហស្បតិ៍សប្តាហ៍នេះយ៉ាងដូច្នេះថា «វាមិនងាយស្រួលនោះទេ ក្នុងការផ្តល់ការព្យាករឱ្យបានច្បាស់ ប៉ុន្តែដំណើរការហាក់​កំពុងប្រព្រឹត្តទៅយ៉ាងល្អប្រសើរ ដែលអាចនឹងចប់រួចរាល់ នៅក្នុងពេល២ខែទៀត»។ លោក កាលីន បានឆ្លើយបែបនេះ ពេលត្រូវគេ​សួរថាតើ ពេលណាសហរដ្ឋអាមេរិក នឹងលក់យន្តហោះចម្បាំង F-16 មកឱ្យតួកគី។

គួរបញ្ជាក់ថា ទីក្រុងអង់ការ៉ាបានដាក់សំណើ ទៅកាន់សហរដ្ឋអាមេរិក កាលពីខែតុលា ឆ្នាំ២០២១ ដើម្បីទិញយន្តហោះចម្បាំង F-16 ថ្មីចំនួន៤០គ្រឿង រួមជាមួយបរិក្ខារទំនើបកម្មជិត៨០ឈុត សម្រាប់យន្តហោះ F-16 ដែលមានស្រាប់ ដើម្បីធ្វើឱ្យកងទ័ពអាកាសខ្លួន មានសមត្ថភាពប្រសើរឡើង ក្រោយមិនអាចទិញយន្តហោះចម្បាំង F-35 បានពីទីក្រុងវ៉ាស៉ីនតោន ​ដោយសារតែភាពចម្រូងចម្រាស ដែលកើតឡើងបន្ទាប់ពី តួកគីទិញប្រព័ន្ធការពារដែនអាកាស S-400 ពីរុស្ស៉ី៕