(ញូដេលី)៖ ការិយាល័យរដ្ឋមន្រ្តីឥណ្ឌា បានឲ្យដឹងនៅថ្ងៃសុក្រនេះថា មន្រ្តីជាន់ខ្ពស់មួយរូបនៃទីក្រុង ម័រប៊ី (Morbi) ត្រូវបានដកបញ្ឈរជើងជាបណ្តោះអាសន្ន ដោយរដ្ឋបាលនៃរដ្ឋហ្គូចារ៉ាត់ (Gujarat) ក្រោយករណីបាក់ស្ពានដែលបណ្តាលឲ្យ មានមនុស្សស្លាប់ចំនួន១៣៥នាក់ កាលពីពេលថ្មីៗនេះ។ នេះបើយោងតាមការចុះផ្សាយដោយទីភ្នាក់ងារសារព័ត៌មាន AFP នៅថ្ងៃសុក្រ ទី៤ ខែវិច្ឆិកា ឆ្នាំ២០២២។

ជំនួយការរបស់អភិបាលរដ្ឋហ្គូចារ៉ាត់ លោក ប៉ាន់កាច់ ចូស៉ី (Pankaj Joshi) បានប្រាប់ក្រុមអ្នកសារព័ត៌មានឲ្យដឹងថា «រដ្ឋបាលនៃរដ្ឋហ្គូចារ៉ាត់ បានព្យួរការងាររបស់ លោក សាន់ឌីបស៉ីន ហ្សាឡា (Sandeepsinh Zala) ដែលជាអភិបាលសាលាក្រុងម័រប៊ី ដោយសារតែករណីបាក់ស្ពានកន្លងមក»។

រហូតមកដល់ពេលឥឡូវ ប៉ូលិសបានចាប់ខ្លួនមនុស្សចំនួន៩នាក់ ដែលពាក់ព័ន្ធនឹងឧប្បត្តិហេតុនេះ ដោយចោទប្រកាន់ពីបទមនុស្សឃាត។ អ្នកដែលត្រូវបានចាប់ខ្លួននោះ រួមមានអ្នកលក់សំបុត្រ សន្តិសុខ៣នាក់ ដែលកំពុងបំពេញភារកិច្ចនៅពេលបាក់ស្ពាន និងអ្នកម៉ៅការដែលទទួលបន្ទុកជួសជុលស្ពាន។

គួរបញ្ជាក់ថា ស្ពានសម័យអាណានិគមនោះ ដែលស្ថិតនៅទីក្រុងម័រប៊ី និងលាតសន្ធឹងឆ្លងកាត់ទន្លេម៉ាចឈូ (Machchhu) ពោរពេញទៅដោយអ្នកទស្សនារាប់រយនាក់ ដែលទៅចូលរួមពិធីបុណ្យឌីវ៉ាលី (Diwali) និងពិធីបុណ្យ ឆាត ពូចា (Chhath Puja) របស់ប្រទេសឥណ្ឌា មុនពេលវាដាច់ ហើយមនុស្សម្នាធ្លាក់ចូលទៅក្នុងទឹកជម្រៅប្រហែល១០ម៉ែត្រ៕