(ប៉េកាំង)៖ ប្រធានាធិបតីចិន លោក ស៊ី ជិនពីង ត្រូវបានតែងតាំងជាអគ្គលេខាធិការ និងជាប្រធានគណៈកម្មការយោធាមជ្ឈិមនៃគណបក្សកុម្មុយនិស្ដចិន សម្រាប់អាណត្តិទី៣ នៅថ្ងៃអាទិត្យនេះ ដែលនេះជាការត្រួសត្រាយផ្លូវឱ្យលោកកាន់តំណែងជាប្រធានាធិបតីរយៈពេល ៥ឆ្នាំបន្តទៀត និងជាប្រធានាធិបតីដ៏មានឥទ្ធិពល ធំបំផុត ចាប់តាំងពីសម័យ លោក ម៉ៅ សេទុង មក។

បន្ទាប់ពីបានទទួលជោគជ័យជាប្រវត្តិសាស្ត្រនេះ លោក Xi Jinping មានប្រសាសន៍ថា «ពិភពលោកទាំងមូល គឺត្រូវការប្រទេសចិន»។

លោក Xi បានមានប្រសាសន៍យ៉ាងដូច្នេះថា «ប្រទេសចិនមិនអាចអភិវឌ្ឍដោយគ្មានពិភពលោកបានទេ ហើយពិភពលោកក៏ត្រូវការប្រទេសចិនផងដែរ។ បន្ទាប់ពីរយៈពេលជាង៤០ឆ្នាំ នៃកិច្ចខិតខំប្រឹងប្រែងឥតឈប់ឈរឆ្ពោះទៅរកកំណែទម្រង់ និងការបើកចំហរ យើងបានបង្កើតអព្ភូតហេតុពីរ គឺការអភិវឌ្ឍន៍សេដ្ឋកិច្ចយ៉ាងឆាប់រហ័ស និងស្ថិរភាពសង្គមរយៈពេលវែង»។

ទន្ទឹមនឹងនោះ លោក​បាន​សន្យា​ថា ​​​នឹងធ្វើការ​ដោយ​ឧស្សាហ៍​ព្យាយាម​ក្នុង​ការ​បំពេញ​ភារកិច្ច ​ ​ដើម្បី​បញ្ជាក់​ថា​សក្ដិសម​នឹង​ការ​ទុក​ចិត្ត​ដ៏​អស្ចារ្យ​របស់​គណបក្កុម្មុយនិស្ដស​ និង​ប្រជាជន​ចិន៕