(ផ្លូរីដា)៖ កាលពីថ្ងៃពុធសប្តាហ៍នេះ ព្យុះ អ៉ីយ៉ាន (Ian) បានបោកបក់មកលើរដ្ឋផ្លូរីដា (Florida) របស់សហរដ្ឋអាមេរិក ក្នុងទម្រង់ជា​ព្យុះហឺរីខិន (Hurricane) កម្រិតទី៤ដ៏ខ្លាំងក្លា ហើយក្រោយការវាយប្រហាររបស់ព្យុះហឺរីខិននេះ មនុស្សយ៉ាងហោចណាស់១២នាក់ ត្រូវបានទទួលស្គាល់ថាស្លាប់ ប៉ុន្តែអាជ្ញាធរបានព្រមានថា តួលេខអ្នកបាត់បង់ជីវិតជាក់ស្តែង អាចច្រើនខ្លាំងជាងនេះទៅទៀត។ នេះបើតាមការចេញផ្សាយដោយ សារព័ត៌មាន BBC នៅថ្ងៃសុក្រ ទី៣០ ខែកញ្ញា ឆ្នាំ២០២២។

មិនតែប៉ុណ្ណោះព្យុះកំណាចខាងលើ បានបង្កឱ្យមានការជន់លិចធ្ងន់ធ្ងរនៅពាសពេញរដ្ឋផ្លូរីដា ខណៈលំនៅឋាននិងអាជីវកម្មរបស់មនុស្ស​សរុបជាង ២លាននាក់កំពុងបន្តគ្មានអគ្គិសនីប្រើប្រាស់។ សម្រាប់ពេលនេះ ព្យុះហឺរីខិន អ៉ីយ៉ាន បានថមថយចុះថាមពលមកនៅត្រឹមជា ព្យុះហឺរីខិនកម្រិតទី១ ដែលមានកម្លាំងខ្យល់បក់ ១២០គីឡូម៉ែត្រក្នុងមួយម៉ោង ហើយកំពុងសំដៅទៅរក រដ្ឋការ៉ូលីណាខាងត្បូង (South Carolina) ដែលជាគោលដៅបន្ទាប់របស់វា។

គួរបញ្ជាក់ថា មុនមកដល់រដ្ឋផ្លូរីដា ព្យុះហឺរីខិន អ៉ីយ៉ាន បានវាយប្រហារលើគុយបា កាលពីថ្ងៃអង្គារសប្តាហ៍នេះ ដែលបានបង្កឱ្យ​មាន ការដាច់ចរន្តអគ្គិសនីនៅទូទាំងប្រទេស។ ទន្ទឹមគ្នាដែរ ដែនដីផឺតូរីកូ (Puerto Rico) របស់សហរដ្ឋអាមេរិក នៅតំបន់សមុទ្រ​ការីបង់ កំពុងតែបន្តកិច្ចប្រឹងប្រែងស្តារឡើងវិញ បន្ទាប់ពីរងការវាយប្រហារពីព្យុះហឺរីខិននេះដូចគ្នា កាលពីសប្តាហ៍មុន៕