(សេអ៊ូល)៖ អនុប្រធានាធិបតីអាមេរិក លោកស្រី កាម៉ាឡា ហារីស (Kamala Harris) បានធ្វើដំណើរទៅដល់កូរ៉េខាងត្បូងហើយ នៅថ្ងៃព្រហស្បតិ៍នេះ ដើម្បីពង្រឹងសម្ព័ន្ធភាពរបស់ទីក្រុងវ៉ាស៊ីនតោន ជាមួយទីក្រុងសេអ៊ូល មួយថ្ងៃប៉ុណ្ណោះបន្ទាប់ពីកូរ៉េខាងជើងបាញ់សាកល្បងមីស៊ីលផ្លោង។ នេះបើតាមការ ចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី២៩ ខែកញ្ញា ឆ្នាំ២០២២។

លោកស្រី ហារីស ដែលបានធ្វើដំណើរទៅដល់មូលដ្ឋានទ័ពអាកាស អូសាន (Osan) ក្រោយបញ្ចប់ទស្សនកិច្ចនៅជប៉ុន ចូលរួមពិធីបុណ្យសពថ្នាក់ជាតិ អតីតនាយករដ្ឋមន្ត្រីជប៉ុ ន លោក អាបេ ស៊ីនហ្សូ គ្រោងនឹងជួបពិភាក្សាការងារជាមួយប្រធានាធិបតីកូរ៉េខាងត្បូង លោក យូន ស៊ុក យុល។ មិនតែប៉ុណ្ណោះ បើតាមក្រុមមន្ត្រីអាមេរិក លោកស្រីអនុប្រធានាធិបតីអាមេរិក ក៏មានផែនការបំពេញទស្សនកិច្ចទៅកាន់តំបន់ព្រំដែនគ្មានយោធារវាងកូរ៉េទាំង២ផងដែរ ខណៈដំណើរទស្សនកិច្ចនេះត្រូវបានគេរំពឹងថានឹងធ្វើឱ្យកូរ៉េខាងជើងក្ដៅក្រហាយ។

កូរ៉េខាងជើង បានធ្វើតេស្ដបាញ់មីស៊ីលផ្លោងចំនួន២គ្រាប់ មុនដំណើរទស្សនកិច្ចរបស់លោកស្រីហារីស ដោយមួយគ្រាប់ត្រូវបានធ្វើតេស្ដកាលពីថ្ងៃអាទិត្យ និងមួយគ្រាប់ទៀតត្រូវបានបាញ់សាកល្បងកាលពីថ្ងៃពុធសប្ដាហ៍នេះ៕