(កៀវ)៖ ទីប្រឹក្សាប្រធានាធិបតីអ៊ុយក្រែនបាននិយាយថា ប្រជាជនអ៊ុយក្រែនដែលជួយការបោះឆ្នោតប្រជាមតិគាំទ្រដោយរុស្ស៊ី នឹងត្រូវប្រឈមមុខនឹងការចោទប្រកាន់ពីបទក្បត់ជាតិ និងជាប់ពន្ធនាគារយ៉ាងហោចណាស់ ៥ឆ្នាំ ខណៈការបោះឆ្នោតនៅក្នុងតំបន់ចំនួន៤ បានឈានចូលដល់ថ្ងៃចុងក្រោយរបស់ខ្លួន។ នេះបើយោងតាមការចេញផ្សាយដោយ សារព័ត៌មាន Reuters នៅថ្ងៃអង្គារ ទី២៧ ខែកញ្ញា ឆ្នាំ២០២២។

ទីប្រឹក្សាប្រធានាធិបតី លោក Mykhailo Podolyak បាននិយាយនៅក្នុងបទសម្ភាសន៍ជាមួយកាសែតស្វីស Blick ថា «យើងមានបញ្ជីឈ្មោះមនុស្ស ដែលបានចូលរួមនៅក្នុងវិធីណាមួយ»។

លោកបានសង្កត់ធ្ងន់ថា «យើងកំពុងនិយាយអំពីអ្នកសហការរាប់រយនាក់។ ពួកគេនឹងត្រូវកាត់ទោសពីបទក្បត់ជាតិ។ ពួកគេប្រឈមមុខនឹងការជាប់ពន្ធនាគារយ៉ាងហោចណាស់ ៥ឆ្នាំ»។

លោក Podoljak បាននិយាយថា ប្រជាជនអ៊ុយក្រែនដែលត្រូវបានបង្ខំឱ្យបោះឆ្នោត នឹងមិនត្រូវបានដាក់ទណ្ឌកម្មនោះទេ។ មន្ត្រីអ៊ុយក្រែនបានរាយការណ៍ថា សន្លឹកឆ្នោតត្រូវបានគេយកពីផ្ទះមួយទៅផ្ទះមួយ ហើយអ្នកស្រុកត្រូវបានបង្ខំឱ្យបោះឆ្នោត នៅចំពោះមុខសន្តិសុខដែលគាំទ្រដោយរុស្ស៊ី។

គួរបញ្ជាក់ថា ទីក្រុងមូស្គូកំពុងដំណើរការរៀបចំ ដើម្បីដាក់បញ្ចូលតំបន់ខឺសុន (Kherson), លូហាន់ (Luhansk), ដូណេត (Donetsk) និងហ្សាប៉ូរីសហ្ស៉ីយ៉ា (Zaporizhzhia) ដែលស្ថិតនៅឯភាគខាងកើត និងខាងត្បូង គឺប្រហែល១៥ ភាគរយនៃទឹកដីរបស់អ៊ុយក្រែន ទៅក្នុងឧបសម្ព័ន្ធរបស់ខ្លួន។ ការបោះឆ្នោតប្រជាមតិរបស់រុស្ស៊ី បានចាប់ផ្តើមកាលពីថ្ងៃសុក្រ ហើយនឹងត្រូវបញ្ចប់នៅថ្ងៃអង្គារនេះ ដោយសភារុស្ស៊ីអាចនឹងអនុម័តការបញ្ចូលឧបសម្ព័ន្ធនេះ ក្នុងរយៈពេលប៉ុន្មានថ្ងៃខាងមុខ៕