(ប៉េកាំង)៖ នៅយប់ថ្ងៃទី១៩ ខែកក្កដា លោក Li Keqiang នាយករដ្ឋមន្ត្រីចិនបានជួបពិភាក្សាជាមួយលោក Klaus Schwab ប្រធានវេទិកាសេដ្ឋកិច្ចពិភពលោកនៅវិមានសភាប្រជាជនតាមប្រព័ន្ធវីដេអូ។

ថ្លែងក្នុងកិច្ចជំនួប លោក Li Keqiang បានលើកឡើងថា កិច្ចសហប្រតិបត្តិការរវាងប្រទេសចិន និងវេទិកាសេដ្ឋកិច្ចពិភពលោក មានរយៈពេលជាង ៤០ ឆ្នាំមកហើយ ពោលគឺវាស្ទើរតែដើរទន្ទឹមគ្នាជាមួយ ដំណើរកំណែទម្រង់និងបើកចំហរបស់ប្រទេសចិន។ ប្រទេសចិនសូមវាយតម្លៃខ្ពស់ចំពោះវេទិកាសេដ្ឋកិច្ចពិភពលោក ដែលតែងតែយកចិត្តទុកដាក់លើការអភិវឌ្ឍសេដ្ឋកិច្ច និងពង្រឹងកិច្ចសហប្រតិបត្តិការជាមួយប្រទេសចិន។ ការធ្វើឱ្យស៊ីជម្រៅនៃកិច្ចសហប្រតិបត្តិការរវាងភាគីទាំងពីរ មានអំណោយផលដល់ការបញ្ចេញសញ្ញាវិជ្ជមាន ទៅកាន់ពិភពលោកក្នុងការអភិវឌ្ឍសេដ្ឋកិច្ច និងកែលម្អជីវភាពរស់នៅរបស់ប្រជាជន។

លោក Li Keqiang បានលើកឡើងទៀតថា មិនថាស្ថានការណ៍អន្តរជាតិប្រែប្រួលយ៉ាងណានោះទេ ប្រទេសចិននឹងប្រកាន់ខ្ជាប់ដោយមិនងាករេ នូវគោលនយោបាយជាតិជាមូលដ្ឋាន ស្តីពីការបើកចំហចំពោះបរទេស ហើយមានឆន្ទៈពង្រឹងការសន្ទនា និងការប្រាស្រ័យទាក់ទងជាមួយភាគីនានា ដើម្បីបង្កលក្ខណៈសម្បត្តិល្អប្រសើរ សម្រាប់កិច្ចសហប្រតិបត្តិការ ដែលផ្តល់ផលប្រយោជន៍ទៅវិញទៅមក និងឈ្នះឈ្នះ។

ជាការឆ្លើយតប លោក Schwab បានថ្លែងថា វេទិកាសេដ្ឋកិច្ចពិភពលោកបានរក្សា ភាពជាដៃគូល្អជាមួយប្រទេសចិន ក្នុងរយៈពេលជាង ៤០ ឆ្នាំកន្លងមកនេះ។ បច្ចុប្បន្ន ពិភពលោកកំពុងប្រឈមមុខនឹងវិបត្តិនិងបញ្ហាប្រឈមជាច្រើន វេទិកាសេដ្ឋកិច្ចពិភពលោកមានឆន្ទៈ ក្នុងការពង្រឹងកិច្ចសហប្រតិបត្តិការជាមួយប្រទេសចិន ក្នុងន័យជំរុញកិច្ចសន្ទនាសកល ជំរុញឱ្យវិស័យឧស្សាហកម្ម និងពាណិជ្ជកម្មដើរតួនាទីសំខាន់ ពង្រឹងការផ្លាស់ប្តូរ និងកិច្ចសហប្រតិបត្តិការអន្តរជាតិ និងក្នុងតំបន់ និងដើរតួនាទីយ៉ាងសកម្មក្នុងការឆ្លើយតបនឹង បញ្ហាបម្រែបម្រួលអាកាសធាតុ ជំរុញការផ្លាស់ប្តូររូបមន្តអភិវឌ្ឍន៍ខាងឧស្សាហកម្ម និងជំរុញសមធម៌នៃសង្គម៕

អត្ថបទ៖ វិទ្យុមិត្តភាពកម្ពុជាចិន