(កៀវ)៖ អភិបាលតំបន់លូហាន់របស់អ៊ុយក្រែន បានឱ្យដឹងនៅថ្ងៃពុធសប្ដាហ៍នេះថា កងទ័ពអ៊ុយក្រែនបានដកថយទៅកាន់តំបន់ជាយក្រុងនៃ ទីក្រុងស៊ីវីយេរ៉ូដូណេត (Sievierodonetsk) បន្ទាប់ពីប្រឈមមុខនឹងការវាយប្រហារយ៉ាងខ្លាំងពីសំណាក់កងទ័ពរុស្ស៉ី ដែលកំពុងផ្ដោតលើ សមរភូមិតំបន់ដុនបាស់ ភាគខាងកើតប្រទេសអ៊ុយក្រែន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី៩ ខែមិថុនា ឆ្នាំ២០២២។

លោក ស៊ែរហ៊ី ហ្កៃដៃ (Serhiy Gaidai) អភិបាលតំបន់លូហាន់កាលពីសប្ដាហ៍មុន បានអះអាងថាកងទ័ពអ៊ុយក្រែនបានវាយរុញច្រានកងទ័ពរុស្ស៉ី ដ៏គួរឱ្យភ្ញាក់ផ្អើលកាលពីសប្ដាហ៍មុន។ ប៉ុន្តែ លោកផ្ទាល់នៅថ្ងៃពុធសប្ដាហ៍នេះបានទទួលស្គាល់ថាតំបន់ភាគច្រើននៃទីក្រុង Sievierodonetsk បានធ្លាក់ចូលក្នុងដៃកងទ័ពរុស្ស៉ី។ លោក Gaidai បានគូសបញ្ជាក់ដូច្នេះថា «កងកម្លាំងរបស់យើងបច្ចុប្បន្ន កំពុងគ្រប់គ្រងតែលើតំបន់ជាយក្រុងនៃ ទីក្រុង Sievierodonetsk តែប៉ុណ្ណោះ។ តែទោះជាបែបនេះក្ដី ការវាយប្រយុទ្ធតស៊ូនៅតែបន្តធ្វើឡើង»។

គួរបញ្ជាក់ថា បើតាមលោក ស៊ែរហ៊ី ហ្កៃដៃ បច្ចុប្បន្ន កងទ័ពរុស្ស៉ីមានបរិក្ខារយោធាច្រើនជាងកងទ័ពអ៊ុយក្រែន ១០ដង នៅតាមផ្នែកខ្លះនៃទីក្រុង Sievierodonetsk ដូច្នេះហើយ អ៊ុយក្រែនរំពឹងថាបណ្ដាប្រទេសលោកខាងលិចនឹងពន្លឿន និងបង្កើនការបញ្ជូនអាវុធមកឱ្យកងទ័ពរបស់ខ្លួន៕