(សេអ៊ូល)៖ ក្រុមមន្រ្តីទីក្រុងសេអ៊ូលបានឱ្យដឹងថា កូរ៉េខាងត្បូងនិងសហរដ្ឋអាមេរិក នាថ្ងៃអង្គារនេះ បានរួមគ្នាសម្ញែងអានុភាពយោធាផ្លូវអាកាសរបស់ពួកគេ ដែលមានការចូលរួមពីយន្តហោះចម្បាំងចំនួន ២០គ្រឿង រួមទាំងយន្តហោះ F-35A នៅលើផ្ទៃអាកាសនៃសមុទ្រលឿង។ នេះបើតាមការចេញផ្សាយដោយ ទីភ្នាក់ងារសារព័ត៌មាន Yonhap នៅថ្ងៃអង្គារ ទី៧ ខែមិថុនា ឆ្នាំ២០២២។

អគ្គសេនាធិការចម្រុះរបស់យោធាកូរ៉េខាងត្បូង បានលើកឡើងថា កំលុងសមយុទ្ធត្រៀមលក្ខណៈនោះ ភាគីកូរ៉េខាងត្បូង បានចល័តយន្តហោះចម្បាំងសរុបចំនួន១៦គ្រឿង រួមមានយន្តហោះ F-35A, F-15K, និង KF-16 ខណៈខាងសហរដ្ឋអាមេរិក បានចល័តយន្តហោះចម្បាំង F-16 ចំនួន៤គ្រឿង។

យោធាកូរ៉េខាងត្បូង បានគូសបញ្ជាក់ថា ក្នុងសេចក្តីថ្លែងការណ៍ថា ទីក្រុងវ៉ាស៉ីនតោននិងទីក្រុងសេអ៊ូល បានបង្ហាញឱ្យឃើញពី សមត្ថភាពដ៏ខ្លាំងក្លារបស់សម្ព័ន្ធមិត្តទាំងពីរ ដើម្បីឆ្លើយតបយ៉ាងឆាប់រហ័ស ចំពោះសកម្មភាពបង្កហេតុណាមួយរបស់កូរ៉េខាងជើង ហើយកំពុងរក្សាជំហរត្រៀមលក្ខណៈយ៉ាងរឹងមាំ។

គួរបញ្ជាក់ថា កាលពីថ្ងៃចន្ទម្សិលមិញ កូរ៉េខាងត្បូងនិងអាមេរិក ទើបតែបានបាញ់មីស៉ីលបាលីស្ទិគចំនួន៨គ្រាប់ ចូលទៅក្នុងសមុទ្រខាងកើត ជាឆ្លើយតបចំពោះការបាញ់មីស៉ីលផ្លោងរយៈចម្ងាយខ្លីចំនួន៨គ្រាប់ របស់កូរ៉េខាងជើងកាលពីថ្ងៃអាទិត្យ។ កាលពីសប្តាហ៍មុន ប្រទេសទាំងពីរ ក៏បានធ្វើសមយុទ្ធជើងទឹករួមគ្នា នៅក្បែរឧបទ្វីបកូរ៉េ ដោយមានការចូលរួមពី នាវាផ្ទុកយន្តហោះចម្បាំងអាមេរិកផងដែរ៕