(កៀវ)៖ អូស្ត្រាលី នៅថ្ងៃអាទិត្យនេះបានឱ្យដឹងថាខ្លួនកំពុងជម្លៀសបុគ្គលិកស្ថានទូតរបស់ខ្លួនចេញពីទីក្រុងកៀវ ខណៈស្ថានការណ៍នៅឯតំបន់ ព្រំដែនរុស្ស៊ី-អ៊ុយក្រែនកាន់តែធ្លាក់ចុះដុនដាប ចំពោះមុខការភ័យខ្លាចពីការផ្ទុះសង្រ្គាម។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអាទិត្យ ទី១៣ ខែកុម្ភៈ ឆ្នាំ២០២២។

សហរដ្ឋអាមេរិក និងសហភាពអឺរ៉ុប បានបង្កើនការព្រមានពីលទ្ធភាពនៃការប្រើកម្លាំងយោធារបស់រុស្ស៊ីលើអ៊ុយក្រែន បើទោះជាទីក្រុងម៉ូស្គូ បដិសេធក៏ដោយ។ នៅក្នុងសេចក្ដីថ្លែងការណ៍មួយ រដ្ឋមន្ត្រីការបរទេសអូស្ត្រាលី លោកស្រី ម៉ារីស ភែន (Marise Payne) បានបញ្ជាក់ថាបុគ្គលិក នៃស្ថានទូតអូស្ត្រាលីប្រចាំទីក្រុងកៀវ ត្រូវបានបង្គាប់ឱ្យជម្លៀសខ្លួនជាបណ្ដោះអាសន្នទៅកាន់ទីក្រុង ល្វៀវ (Lviv) ដែលជាទីក្រុងមួយនៅស្ថិតនៅ ភាគខាងលិចប្រទេសអ៊ុយក្រែន និងមានចម្ងាយប្រហែល ៧០គីឡូម៉ែត្រ ពីព្រំដែនប៉ូឡូញ។

លោកស្រី Marise Payne ក៏បានជំរុញឱ្យប្រជាជនអូស្ត្រាលីចាកចេញពីប្រទេសអ៊ុយក្រែន ឱ្យបានឆាប់រហ័ស ខណៈរដ្ឋាភិបាលអូស្រ្តាលីបានស្នើឱ្យ ចិន ចេញមុខជួយដោះស្រាយវិបត្តិអ៊ុយក្រែន៕