(ឡុងដ៍)៖ រដ្ឋមន្ត្រីការបរទេសអាមេរិក លោក អាន់តូនី ប្លីងគែន (Antony Blinken) បានព្រមានតាមរយៈសន្និសីទមួយរបស់ ទីភ្នាក់ងារសារព័ត៌មាន Reuters នៅថ្ងៃសុក្រសប្តាហ៍នេះថា ថ្នាក់ដឹកនាំចិនទាំងឡាយគួរតែគិតគូរ ប្រកបដោយការប្រុងប្រយ័ត្ន អំពីសកម្មភាពរបស់ពួកគេ ចំពោះកោះតៃវ៉ាន់ ដោយចិននឹងអាចជួប «ផលវិបាកដ៏អាក្រក់» ប្រសិនបើប្រទេសនេះបង្កបញ្ហា នៅតំបន់ច្រកសមុទ្រតៃវ៉ាន់។ នេះបើតាមការដកស្រង់ព័ត៌មាន នៅព្រឹកថ្ងៃសៅរ៍ ទី០៤ ខែធ្នូ ឆ្នាំ២០២១។

ក្រៅពីការលើកឡើងពាក់ព័ន្ធបញ្ហាចិន និងតៃវ៉ាន់, តាមរយៈកិច្ចសម្ភាសន៍ជាមួយ Reuters លោក អាន់តូនី ប្លីងគែន ក៏បានលើកឡើងផងដែរ អំពីការត្រៀមឆ្លើយតបផ្នែកនយោបាយ ពីសំណាក់រដ្ឋបាលប្រធានាធិបតីអាមេរិក លោក ចូ បៃដិន ទៅលើការស្តារឡើងវិញនូវ កិច្ចព្រមព្រៀងនុយក្លេអ៊ែរអ៊ីរ៉ង់ឆ្នាំ ២០១៥ ព្រមទាំងការដោះស្រាយបញ្ហាប្រឈមផ្សេងៗទៀត ដូចជាការបង្កើនឥទ្ធិពលយោធារុស្ស៊ី នៅក្បែរប្រទេសអ៊ុយក្រែន និងជម្លោះយ៉ាងក្តៅគគុកនៅអេត្យូពីជាដើម។

គួរបញ្ជាក់ថា ការថ្លែងរបស់រដ្ឋមន្ត្រីការបរទេសអាមេរិក ក៏មិនខុសពីការលើកឡើង កាលពីលើកមុនៗរបស់ខ្លួនផងដែរ នោះគឺការប្តេជ្ញាចិត្តយ៉ាងមុតមាំរបស់សហរដ្ឋអាមេរិក ក្នុងការជួយកោះតៃវ៉ាន់ឲ្យមានសមត្ថភាព «ការពារខ្លួនឯង»។ ក្រសួងការពារជាតិ នៃកោះតៃវ៉ាន់ធ្លាប់បានលើកឡើងកាលពីពេលថ្មីៗនេះថា ភាពតានតឹងរវាងចិន និងតៃវ៉ាន់ គឺអាក្រក់បំផុតមិនធ្លាប់មានជាង ៤០ឆ្នាំមកនេះ ហើយចិនអាចនឹងបើកការវាយប្រហារ យ៉ាងពេញទំហឹងមកលើកោះនេះនៅឆ្នាំ២០២៥។

យ៉ាងណាក៏ដោយ ទីក្រុងប៉េកាំងធ្លាប់បានព្រមានជាច្រើនលើករួចមកហើយថា ការចូលមកលូកលាន់បញ្ហាកោះតៃវ៉ាន់ គឺមិនខុសអ្វីពីការប្រឡែងលេង ជាមួយនឹងភ្លើងនោះឡើយ។ សម្រាប់ការលើកឡើងដ៏រសើប ដោយសហរដ្ឋអាមេរិកជាបន្តបន្ទាប់ក្នុងសប្តាហ៍នេះ ចិនមិនទាន់ចេញសេចក្តីថ្លែងការណ៍ណាមួយ ដើម្បីឆ្លើយតបទៅវិញនៅឡើយទេ៕