(វ៉ាស៉ីនតោន)៖ ប្រធានាធិបតីអាមេរិក លោក ចូ បៃដិន នៅថ្ងៃសុក្រសប្ដាហ៍នេះបានថ្លែងថា ប្រជាជនអាមេរិកប្រមាណ ៦០លាននាក់ នាពេលឥឡូវនេះ មានសិទ្ធិទទួលបានការចាក់វ៉ាក់សាំងបង្ការជំងឺ COVID-19 ដែលអភិវឌ្ឍឡើងដោយក្រុមហ៊ុនអាមេរិក Pfizer ដូសទី ៣ ឬដូសជំរុញហើយ។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅព្រឹកថ្ងៃសៅរ៍ ទី២៥ ខែកញ្ញា ឆ្នាំ២០២១។

អាជ្ញាធរសុខាភិបាលអាមេរិក បានផ្តល់អនុសាសន៍ឱ្យក្រុមមនុស្ស ៣ប្រភេទ មានសិទ្ធិទទួលបានការចាក់វ៉ាក់សាំងដូសទី ៣ នោះគឺក្រុមមនុស្សដែលមានអាយុចាប់ពី ៦៥ឆ្នាំឡើងទៅ, ក្រុមមនុស្សដែលមានអាយុចាប់ពី ១៨ ដល់ ៦៤ឆ្នាំដែលមានជំងឺប្រចាំកាយ ដូចជាជំងឺទឹកនោមផ្អែម ឬជំងឺធាត់ជាដើម និងក្រុមមនុស្សដែលមានហានិភ័យខ្ពស់ក្នុងការឆ្លងជំងឺនេះ ជាពិសេសដោយសារការងាររបស់ពួកគេ ឬកន្លែងដែលពួកគេរស់នៅ រួមទាំងគ្រូបង្រៀន បុគ្គលិកនៅតាមហាងលក់គ្រឿងទេស បុគ្គលិកថែទាំសុខភាព អ្នកទោស និងអ្នកដែលរស់នៅក្នុងទីជម្រក សម្រាប់អ្នកដែលគ្មានផ្ទះសម្បែងផងដែរ។

លោក ចូ បៃដិន ដែលមានវ័យ ៧៨ឆ្នាំបានថ្លែងនៅក្នុងសុន្ទរកថាមួយនៅឯសេតវិមានថា «សូមទៅទទួលការចាក់វ៉ាក់សាំងដូសទី ៣។ ខ្ញុំនឹងទទួលការចាក់វ៉ាក់សាំងដូសទី ៣ របស់ខ្ញុំ ក្នុងពេលឆាប់ៗតាមដែលខ្ញុំអាចធ្វើបាន»។

លោក ចូ បៃដិន បានថ្លែងបន្ថែមថា សម្រាប់អ្នកដែលបានទទួលការចាក់វ៉ាក់សាំង Moderna ឬ Johnson & Johnson នឹងអាចទទួលបានការចាក់ដូសទី ៣ នៅពេលការត្រួតពិនិត្យត្រូវបានបញ្ចប់ ហើយលោករំពឹងថា ជនជាតិអាមេរិកទាំងអស់ នឹងមានសិទ្ធិទទួលបានការចាក់ដូសទី ៣ ក្នុងរយៈពេលដ៏ខ្លីខាងមុខនេះ។ មិនទាន់មានរបាយការណ៍ណាមួយអាចបញ្ជាក់ថា តើមកទល់នឹងពេលនេះ ប្រជាជនអាមេរិកប៉ុន្មានលាននាក់ហើយ ដែលបានចាក់ដូសទី ៣ នោះទេ៕