(កាប៊ុល)៖ អ្នកស្លាប់កើនដល់៤០នាក់ និងរបួស១២០នាក់ ក្នុងនោះរួមមានទាំងកុមារផងដែរ ក្នុងហេតុការណ៍ផ្ទុះគ្រាប់បែកអត្តឃាតចំនួន២គ្រាប់ នៅច្រកទ្វារចូល អាកាសយានដ្ឋានកាប៊ុល។ នេះបើយោងតាមការចេញផ្សាយដោយសារព័ត៌មាន RT នៅយប់ថ្ងៃព្រហស្បតិ៍ ទី២៦ ខែសីហា ឆ្នាំ២០២១។

ការវាយប្រហារនេះបានកើតឡើងនៅម៉ោងប្រហែល ៥៖១១នាទីល្ងាច ម៉ោងក្នុងស្រុកនៅថ្ងៃព្រហស្បតិ៍នេះ ខណៈដែលមនុស្សរាប់ពាន់នាក់ រួមទាំងគ្រួសារអាហ្វហ្គានីស្ថានជាច្រើន បានព្យាយាមទៅធ្វើដំណើរជិះយន្តហោះដើម្បីចាកចេញពីអាហ្វហ្គានីស្ថានជាទីដែលពួកតាលីបង់ទើបតែបានគ្រប់គ្រង។

ពាក់ព័ន្ធករណីវាយប្រហារនេះ ក្រុម Islamic State Khorasan (ISIS-K) បានប្រកាសថា ពួកគេជាអ្នករៀបចំផែនការបំផ្ទុះគ្រាប់បែកនេះ៕