(គូឡាឡាំពួ)៖ នៅថ្ងៃអាទិត្យនេះ ករណីឆ្លងជំងឺ COVID-19 នៅទូទាំងប្រទេសម៉ាឡេស៉ី បានកើនលើស១លាននាក់ហើយ គិតចាប់តាំងពី ជំងឺនេះបានចាប់ផ្តើមផ្ទុះរាលដាលឡើងដំបូង។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នៅថ្ងៃអាទិត្យ ទី២៥ ខែកក្កដា ឆ្នាំ២០២១។

នៅថ្ងៃអាទិត្យនេះ ក្រសួងសុខាភិបាលម៉ាឡេស៉ី បានប្រកាសពីការរកឃើញ ករណីឆ្លង COVID-19 ចំនួន ១៧,០៤៥នាក់បន្ថែម ដែលជាកំណត់ត្រាថ្មីមួយទៀត។ ក្នុងនោះកន្លែងដែលរាយការណ៍ករណីឆ្លងថ្មីៗច្រើនជាងគេ គឺរដ្ឋសេឡានហ្គ័រ (Selangor) ដែលមាន ៨,៥០០ករណី បន្ទាប់មកគឺទីក្រុងគូឡាឡាំពួដែលមាន ២,០៤៥ករណី និងរដ្ឋកេដាដែលមាន ១,២១៦ករណី។

គួរបញ្ជាក់ថា តួលេខករណីឆ្លង COVID-19 នៅទូទាំងប្រទេសម៉ាឡេស៉ី សរុបនាពេលបានឡើងដល់ ១,០១៣,៤៣៨នាក់ ក្នុងនោះស្លាប់ជិត៨,០០០នាក់ និងជាសះស្បើយជាង៨០ម៉ឺននាក់។ សម្រាប់ការចាក់វ៉ាក់សាំងវិញ ម៉ាឡេស៉ីសម្រេចបាន ១៧លានដូស ក្នុងនោះមនុស្សជាង ៥លាននាក់ ឬស្មើនឹង ១៧ភាគរយនៃប្រជាជនសរុប ចាក់បានគ្រប់ដូស៕