(បាងកក)៖ អ្នកនាំពាក្យក្រសួងការពារជាតិថៃ លោកឧត្តមសេនីយ៍ឯក គង់ឈីប តាន់ត្រាវ៉ានីត (Kongcheep Tantrawanit) បានថ្លែងថា នាយករដ្ឋមន្រ្តីថៃលោក ប្រាយុទ្ធ ចាន់អូចា (Prayut Chan-ocha) បានប្រាប់ក្រសួងការពារជាតិ និងកងទ័ពជើងទឹកថៃ (RTN) ឱ្យពិចារណាពន្យារការបញ្ជាទិញនាវាមុជទឹកចំនួន ០២គ្រឿងសិន រហូតដល់ស្ថានការណ៍ COVID-19 មានភាពប្រសើរឡើងវិញ។ នេះបើតាមការចេញផ្សាយ ដោយសារព័ត៌មានថៃ The Nation នៅល្ងាចថ្ងៃចន្ទ ទី១៩ ខែកក្កដា ឆ្នាំ២០២១។

កងទ័ពជើងទឹកថៃ បានដាក់សំណើទិញនាវាមុជទឹកចំនួន ០២គ្រឿងទៅកាន់គណៈកម្មាធិការពិសេសរបស់សភា ដែលពិចារណាលើថវិកាសម្រាប់ឆ្នាំ២០២២ ដោយនិយាយថា វាជាកាតព្វកិច្ចរបស់ពួកគេក្នុងការដាក់សំណើ ដើម្បីរក្សាកម្រិតនៃការត្រៀមខ្លួន របស់កងទ័ពជើងទឹកថៃ។ ប៉ុន្តែសកម្មភាពនេះ បានធ្វើឱ្យមានការរិះគន់យ៉ាងខ្លាំង ពីសំណាក់សាធារណជន និងគណបក្សប្រឆាំង។

ជុំវិញបញ្ហានេះ លោក Kongcheep បាននិយាយថា «ក្រសួង និងកងទ័ពជើងទឹកថៃបានដឹងហើយថា ស្ថានភាពជំងឺ COVID-19 នៅតែកំពុងជះឥទ្ធិពលដល់ប្រជាជនថៃយ៉ាងខ្លាំង... ដូច្នេះយើងបានយល់ព្រមពន្យារការទិញនាវាមុជទឹក ដែលបានគ្រោងទុកនៅឆ្នាំ២០២១ ដោយប្រើប្រាស់ថវិកាឆ្នាំ២០២២ នោះវិញហើយ។ ក្រសួងនឹងពិភាក្សាជាមួយក្រសួងការពារជាតិចិន ដែលនឹងលក់នាវាមុជទឹកដល់យើង អំពីតម្រូវការរបស់យើងដើម្បីពន្យារការបញ្ជាទិញ»។

គួរបញ្ជាក់តាមលោក Kongcheep ឲ្យដឹងទៀតថា កងទ័ពជើងទឹក ក៏បានកាត់បន្ថយការចំណាយរបស់ខ្លួន ហើយបានជួយសន្សំថវិការដ្ឋាភិបាលចំនួន ៣.៣៧ពាន់លានបាតក្នុងឆ្នាំ២០២០ និង ៣.៤២ពាន់លានបាតក្នុងឆ្នាំ២០២១ផងដែរ៕