(ឡុងដ៍)៖ នាយករដ្ឋមន្រ្តីអង់គ្លេសលោក Boris Johnson បានរៀបការជាមួយគូដណ្តឹងរបស់លោកគឺលោកស្រី Carrie Symonds នៅក្នុងពិធីរៀបអាពាហ៍ពិពាហ៍ដែលបានគ្រោងទុកជាសម្ងាត់ នៅវិហារ Westminster។ នេះបើយោងតាមការចេញផ្សាយដោយ សារព័ត៌មាន BBC នៅថ្ងៃអាទិត្យ ទី៣០ ខែឧសភា ឆ្នាំ២០២១។

អ្នកនាំពាក្យវិមាន Downing Street បានគូសបញ្ជាក់ថា ពិធីមង្គលការបានប្រព្រឹត្តទៅក្នុងពិធីតូចមួយ នៅរសៀលថ្ងៃសៅរ៍សប្តាហ៍នេះ។

អ្នកនាំពាក្យរូបនេះបានបន្ថែមទៀតថា ប្តីប្រពន្ធនេះនឹងប្រារព្ធពិធីជួបជុំជាមួយក្រុមគ្រួសារ និងមិត្តភក្តិនៅរដូវក្តៅខាងមុខនេះ។

គួរបញ្ជាក់ថា លោក Boris Johnson វ័យ ៥៦ឆ្នាំរូបនេះ គឺជានាយករដ្ឋមន្រ្តីអង់គ្លេសដំបូងគេបំផុត ដែលបានរៀបការក្នុងកំឡុងពេលកំពុងកាន់តំណែង ក្នុងរយៈពេលជិត ២០០ឆ្នាំមកនេះ។ នាយករដ្ឋមន្រ្តីចុងក្រោយគេដែលបានរៀបការកំឡុងពេលកំពុងកាន់តំណែង គឺលោក Robert Banks Jenkinson ក្នុងឆ្នាំ ១៨២២៕