(ឡុងដ៍)៖ រដ្ឋមន្រ្តីសុខាភិបាលចក្រភពអង់គ្លេស លោក មែត ហែនខក (Matt Hancock) នឹងត្រូវប្រឈមមុខជាមួយការសួរដេញដោលពីសមាជិកសភា បន្ទាប់ពីអតីតទីប្រឹក្សាជាន់ខ្ពស់ របស់នាយករដ្ឋមន្រ្តីអង់គ្លេស បានចោទប្រកាន់លោកថា បាននិយាយកុហក និងបានថ្លែងទៀតថា លោកគួរតែត្រូវបានគេបណ្តេញចេញ ដោយសារតែការធ្វើខុសម្តងហើយម្តងទៀត ទាក់ទងនឹងបញ្ហាឆ្លងរាលដាលនៃជំងឺ COVID-19។ នេះបើតាមការចេញផ្សាយ ដោយសារព័ត៌មាន Reuters នៅល្ងាចថ្ងៃព្រហស្បតិ៍ ទី២៧ ខែឧសភា ឆ្នាំ២០២១។

លោក ដូមីនីក ឃ្យូមមីង (Dominic Cummings) ដែលជាអតីតទីប្រឹក្សាជាន់ខ្ពស់របស់ នាយករដ្ឋមន្រ្តីអង់គ្លេស លោក បូរីស ចនសុន (Boris Johnson) បានវាយប្រហារយ៉ាងចាស់ដៃទៅលើលោក Matt Hancock ក្នុងអំឡុងពេលផ្តល់សក្ខីកម្ម ០៧ម៉ោង ចំពោះមុខគណៈកម្មាធិការសភា កាលពីថ្ងៃពុធម្សិលមិញនេះ ដោយបាននិយាយថា ការអសមត្ថភាពរបស់ពួកគេ ក្នុងការប្រយុទ្ធប្រឆាំងនឹងការឆ្លងរីករាលដាលនៃជំងឺ COVID-19 បានធ្វើឱ្យមនុស្សរាប់ពាន់នាក់បាត់បង់ជីវិត។

លោក Boris Johnson និងលោក Dominic Cummings បាននិយាយថា លោក Matt Hancock មិនសមនឹងតួនាទីរបស់គាត់ទេ ដែលគាត់បាននិយាយកុហកម្តងហើយម្តងទៀត រហូតដល់មន្ត្រីរាជការកំពូលរបស់ចក្រភពអង់គ្លេស បាត់បង់ទំនុកចិត្តលើភាពស្មោះត្រង់របស់គាត់។

គួរបញ្ជាក់ថា លោក Matt Hancock នឹងត្រូវឆ្លើយសំនួរបន្ទាន់ពីគណបក្ស នៅថ្ងៃព្រហស្បតិ៍នេះនៅក្នុងវិមានសភា ហើយបន្ទាប់មកនឹងត្រូវប្រឈមមុខ ជាមួយនឹងកាមេរ៉ាជាច្រើននៅក្នុងសន្និសីទសារព័ត៌មាន។ លោក Matt បានប្រាប់អ្នកសារព័ត៌មាន នៅខាងក្រៅគេហដ្ឋានរបស់លោកថា «ខ្ញុំទើបនឹងដាក់ឲ្យដំណើរការ នូវកម្មវិធីចាក់វ៉ាក់សាំងបង្ការជំងឺ COVID-19 ហើយបន្ទាប់មកខ្ញុំនឹងទៅវិមានសភា ដើម្បីឆ្លើយសំណួរនៅទីនោះ»៕