(ប៉ារីស)៖ ប្រធានាធិបតីបារាំង លោក អែមម៉ានុយអែល ម៉ាក្រុងបានអំពាវនាវឱ្យសហរដ្ឋអាមេរិកលុបចោលការរឹតត្បិត ឬបម្រាមលើការនាំចេញវ៉ាក់សាំង COVID-19 និងវត្ថុធាតុដើមសំខាន់ៗដែលចាំបាច់សម្រាប់ផលិតវ៉ាក់សាំង។ នេះបើតាមការចេញផ្សាយដោយសារព័ត៌មាន BBC នៅថ្ងៃអាទិត្យ ទី០៩ ខែឧសភា ឆ្នាំ២០២១។

ការអំពាវនាវរបស់លោក ម៉ាក្រុងធ្វើឡើងនៅចំពេលសហរដ្ឋអាមេរិក និងបណ្ដាប្រទេសអឺរ៉ុបមួយចំនួនកំពុងខ្វែងគំនិតគ្នាជុំវិញមធ្យោបាយបង្កើនការផលិតវ៉ាក់សាំង នៅទូទាំងពិភពលោក ក្រោយរដ្ឋបាលលោក ចូ បៃដិន ប្រកាសគាំទ្រលើកលែងប៉ាតង់វ៉ាក់សាំង។ បើតាមលោក ម៉ាក្រុង ការបង្កើនការនាំចេញ និងការផលិត ទើបជាមធ្យោបាយល្អមួយក្នុងការដោះស្រាយវិបតិ្ត COVID-19 នាពេលបច្ចុប្បន្ន។

ប្រធានាធិបតីបារាំងរូបនេះបានគូសបញ្ជាក់បន្ថែមដូច្នេះថា៖ «គន្លឹះសំខាន់ដើម្បីផលិតវ៉ាក់សាំងឱ្យបានកាន់តែលឿនរហ័សសម្រាប់ផ្គត់ផ្គង់ដល់បណ្ដាប្រទេស ក្រីក្រទាំងអស់ ឬប្រទេសមានប្រាក់ចំណូលមធ្យម នោះគឺបង្កើនការផលិត»។

លោកបន្ថែមថាសហរដ្ឋអាមេរិកគួរតែលុបចោលការរឹតត្បិតមិនមែនត្រឹមតែលើ ការនាំចេញវ៉ាក់សាំងប៉ុណ្ណោះទេ ប៉ុន្តែក៏ត្រូវលុបចោលការរឹតត្បិតលើការនាំចេញវត្ថុធាតុដើមសម្រាប់ផលិតវ៉ាក់សាំងផងដែរ ដែលកំពុងបង្កការរាំងស្ទះដល់ការផលិត។

គួរបញ្ជាក់ថា បច្ចុប្បន្ន វ៉ាក់សាំង ១.២៥ពាន់លានដូសត្រូវបានប្រើប្រាស់ ឬចាក់នៅជុំវិញពិភពលោក។ ក៏ប៉ុន្តែ វ៉ាក់សាំងតិចជាង ១ភាគរយតែប៉ុណ្ណោះ ត្រូវបានប្រើប្រាស់នក្នុងបណ្ដាប្រទេសក្រីក្រចំនួន២៩ នៅជុំវិញពិភពលោក ហើយវ៉ាក់សាំងភាគច្រើនកំពុងស្ថិតនៅកណ្ដាប់ដៃប្រទេសអ្នកមានដូចជា សហរដ្ឋអាមេរិក និងចក្រភពអង់គ្លេសដែលត្រូវបានគេរាយការណ៍ថា បានទិញវ៉ាក់សាំងស្ដុកទុកលើសមិនប្រើរាប់រយលានដូស៕