(ម៉ូស្គូ)៖ ទីភ្នាក់ងារអវកាសរុស្ស៉ី នៅថ្ងៃអង្គារសប្តាហ៍នេះ បានប្រកាសពីការចុះកិច្ចព្រមព្រៀង សហការគ្នាជាមួយប្រទេសចិន ដើម្បីរៀបចំបង្កើតស្ថានីយស្រាវជ្រាវអន្តរជាតិនៅឋានព្រះច័ន្ទ។ នេះបើតាមការចេញផ្សាយ ដោយសារព័ត៌មាន CNA នៅរសៀលថ្ងៃពុធ ទី១០ ខែមីនា ឆ្នាំ២០២១។

ទីភ្នាក់ងារអវកាសរុស្ស៉ី រ៉ូសកូស្មូស (Roscosmos) បានបញ្ជាក់ដូច្នេះថា «ស្ថានីយវិទ្យាសាស្រ្តអន្តរជាតិនៅឋានព្រះច័ន្ទនោះ នឹងជាមូលដ្ឋានពិសោធន៍ និងស្រាវជ្រាវ ដែលសាងសង់ឡើងនៅលើផ្ទៃព្រះច័ន្ទផ្ទាល់ ឬនៅគន្លងគោចររបស់ព្រះច័ន្ទ ឬមួយក៏អាចនៅលើផ្ទៃព្រះច័ន្ទផង និងនៅលើគន្លងអវកាសជុំវិញព្រះច័ន្ទផង»។ កិច្ចព្រមព្រៀងអភិវឌ្ឍស្ថានីយនេះ ត្រូវបានចុះហត្ថលេខាដោយប្រធានទីភ្នាក់ងារអវកាសរុស្ស៉ី និងប្រធានទីភ្នាក់ងារអវកាសចិន CNSA កំឡុងកិច្ចប្រជុំមួយតាមប្រព័ន្ធវីដេអូ។

គួរបញ្ជាក់ថា បើតាមទីភ្នាក់ងារ Roscosmos ប្រទេសរុស្ស៉ី និងចិននឹងបង្កើតផែនទីចង្អុលបង្ហាញមួយ សម្រាប់ការអភិវឌ្ឍស្ថានីយខាងលើ ហើយនឹងធ្វើកិច្ចសហប្រតិបត្តិការ យ៉ាងជិតស្និទ្ធលើការគ្រោងរៀបចំការរចនា និងការអនុវត្តវា ហើយបង្ហាញគម្រោងនេះជូនដល់សហគមន៍អវកាសអន្តរជាតិ ដោយបើកចំហផងដែរ។

កាលពីអំឡុងឆ្នាំ២០១៩ រុស្ស៊ីក៏ធ្លាប់បានប្រកាសម្តងរួចមកហើយ អំពីគំរោងសាងសង់អគារស្នាក់នៅ និងពិសោធន៍នៅលើផ្ទៃព្រះច័ន្ទនៅទសវត្សរ៍ ២០៤០ ដោយការប្រើប្រាស់ធនធានលើព្រះច័ន្ទជាចម្បង។ ដោយឡែកសម្រាប់អង្គការ NASA របស់អាមេរិកវិញ ក៏កំពុងអភិវឌ្ឍគំរោង Artemis របស់ខ្លួនទៅមុខជាបណ្តើរៗផងដែរ តាមរយៈការត្រៀមបញ្ជូនមនុស្ស ទៅជាន់ដីព្រះច័ន្ទជាថ្មីនៅឆ្នាំ២០២៤ ព្រមទាំងរៀបចំបោះមូលដ្ឋានស្នាក់នៅ និងពិសោធន៍នៅទីនោះតែម្តង នៅប៉ុន្មានឆ្នាំបន្ទាប់៕