(បាងកក)៖ អាជ្ញាធរថៃនៅថ្ងៃពុធ ទី១៧ ខែកុម្ភៈ ឆ្នាំ២០២១នេះ បានប្រកាសរកឃើញករណីឆ្លង COVID-19 សរុបចំនួន ១៧៥នាក់ថ្មីទៀត ដោយក្នុងនោះ ១៦៨នាក់ជាករណីឆ្លងក្នុងស្រុក និង ០៧នាក់ទៀតជាករណីនាំចូលពីក្រៅប្រទេស។ នេះបើតាមការចេញផ្សាយ ដោយសារព័ត៌មានបាងកកប៉ុស្តិ៍។

បើតាមអាជ្ញាធរគ្រប់គ្រងស្ថានការណ៍ COVID-19 នៅក្នុងប្រទេសថៃ ក្នុងចំណោមករណីឆ្លងក្នុងស្រុកទាំង ១៦៩ករណីនោះ ១១៤ត្រូវបានធ្វើតេស្តរកឃើញ នៅក្នុងសហគមន៍រស់នៅរបស់ពួកគេផ្ទាល់ និង ៥៤នាក់ទៀតនៅក្នុងមន្ទីរពេទ្យ។ ខេត្តផាទុំថានី (Pathum Thani) ស្ថិតនៅក្បែរទីក្រុងបាងកក ជាតំបន់កើតមានករណីឆ្លង ច្រើនជាងគេបំផុតនៅក្នុងប្រទេស ដោយរ៉ាប់រងរហូតដល់ទៅ ៨២ករណី ខណៈខេត្តសាមុតសាខនមាន ៧៣ករណី។

គិតត្រឹមថ្ងៃពុធនេះ ប្រទេសថៃមានករណីឆ្លង COVID-19 សរុប ២៤,៩៦១ករណី ក្នុងនោះមានអ្នកស្លាប់ ៨២នាក់ និងជាសះស្បើយវិញ ២៣,៦៩៧នាក់។ ក្នុងចំណោមករណីឆ្លង COVID-19 ក្នុងប្រទេសថៃទាំង ១៦៨ករណីថ្មីៗនេះ ភាគច្រើនបំផុតគឺជាជនជាតិថៃ និងមីយ៉ាន់ម៉ា ប៉ុន្តែក្នុងនោះក៏មានជនជាតិឡាវម្នាក់ និងជនជាតិខ្មែរម្នាក់ផងដែរ៕