(វ៉ាស៊ីនតោន)៖ ក្នុងរយៈពេល ២៤ម៉ោងកន្លងទៅនេះ មនុស្សសរុប ១២៧,៧៤០នាក់ទៀតបានឆ្លង COVID-19 ខណៈអ្នកជំងឺ ១,២១៥នាក់ទៀតឯណោះបានស្លាប់ នៅក្នុងរយៈពេលដូចគ្នា នៅទូទាំងសហរដ្ឋអាមេរិក ដោយអ្នកឆ្លងថ្មីៗដល់ទៅជាង ១លាននាក់ ត្រូវបានគេរាយការណ៍ក្នុងរយៈពេលមិនដល់មួយសប្ដាហ៍ផង។ នេះបើតាមការដកស្រង់ទិន្នន័យ ចេញពីគេហទំព័រ Worldometers នាព្រឹកថ្ងៃចន្ទ ទី២៨ ខែធ្នូ ឆ្នាំ២០២០។

ក្រោយការបូកសរុបទិន្នន័យបន្ថែមខាងលើនេះ នាំឲ្យចំនួនករណីឆ្លង COVID-19 សរុបនៅទូទាំងសហរដ្ឋអាមេរិកកើនឡើងដល់ ១៩,៥៧៣,៨៤៧ករណី ក្នុងនោះមានអ្នកស្លាប់សរុបចំនួន ៣៤១,១៣៨នាក់ និងជាសះស្បើយឡើងសរុបចំនួន ១១,៤៩៥,៨៧៥នាក់។

គួរបញ្ជាក់ថា លោក ចូ បៃដិន ដែលនឹងត្រូវស្បថឡើងកាន់តំណែងប្រធានាធិបតីអាមេរិក ជាផ្លូវការនៅថ្ងៃទី២០ ខែមករា ឆ្នាំ២០២១ ក៏ធ្លាប់បានលើកឡើងដែរថា លោកនឹងប្រើពេល ១០០ថ្ងៃ ដើម្បីទប់ទល់ការឆ្លងរាតត្បាតវីរុសកូរ៉ូណា ក្នុងនោះមានដូចជាការតម្រូវ ឲ្យពាក់ម៉ាសទូទាំងប្រទេសជាដើម៕