(ញូយ៉ក)៖ ឆ្លើយតបនឹងការចោទប្រកាន់ ពីសំណាក់ប្រធានាធិបតីអាមេរិក លោក ដូណាល់ ត្រាំ មកលើប្រទេសចិន នៅចំពោះមុខមហាសន្និបាតអង្គការសហប្រជាជាតិ (UNGA) នៅថ្ងៃទី២២ ខែកញ្ញា (ពេលវេលានៅញូយ៉ក) ប្រធានាធិបតីចិនលោក ស៊ី ជិនពីង បានឆ្លើយតបទៅវិញថា ប្រទេសចិនគ្មានចំណងធ្វើសង្គ្រាមត្រជាក់ ឬក្តៅគគុកជាមួយប្រទេសណាមួយឡើយ។ នេះបើតាមការចេញផ្សាយដោយ សារព័ត៌មាន CNA នាព្រឹកថ្ងៃពុធ ទី២៣ ខែកញ្ញា ឆ្នាំ២០២០។

ក្រៅពីការលើកឡើងខាងលើនេះ លោក ស៊ី ជិនពីង ថែមទាំងបានអំពាវនាវផងដែរ ឲ្យគ្រប់ប្រទេសទាំងអស់បង្កើនកិច្ចសហប្រតិបត្តិការជាមួយគ្នា ដើម្បីប្រយុទ្ធប្រឆាំងនឹងជំងឺរាតត្បាតសកល (COVID-19)។ លោក ដូណាល់ ត្រាំ នៅចំពោះមុខវេទិកា UNGA បានទាមទារឲ្យប្រទេសចិន ទទួលខុសត្រូវចំពោះរីករាតត្បាតនៃជំងឺ COVID-19 ទៅកាន់ពិភពលោក ដោយលោកបានចោទចិនថា មិនបានគ្រប់គ្រងវីរុសនេះដោយត្រឹមត្រូវ។

ជុំវិញបញ្ហាខាងលើ តំណាងជាន់ខ្ពស់ចិនប្រចាំនៅអង្គការសហប្រជាជាតិ លោក ចាង ជុន (Zhang Jun) ក៏បានប្រកាសច្រានចោលការចោទប្រកាន់របស់លោក ត្រាំ ចំពោះប្រទេសជាថ្មីនេះផងដែរ ដោយលោកបានចាត់ទុកថា «គ្មានមូលដ្ឋាន» និងជាពាក្យកហុក ដែលត្រូវបានលើកមកនិយាយ រាប់ពាន់ដងមកហើយ ប៉ុន្តែវានៅតែជាពាក្យកុហក។

គួរបញ្ជាក់ថា ទំនាក់ទំនងរវាងចិន និងសហរដ្ឋអាមេរិក បានធ្លាក់ចុះកាន់តែខ្លាំងឡើងៗ គិតចាប់តាំងពីការផ្ទុះសង្គ្រាមពាណិជ្ជកម្ម, បាតុកម្មនៅហុងកុង, ជំងឺរាតត្បាតសកល COVID-19 និងបញ្ហាកោះតៃវ៉ាន់ជាដើម។ ខណៈការបោះឆ្នោតអាមេរិក នឹងឈានចូលមកដល់ នៅថ្ងៃទី០៣ ខែវិច្ឆិកា ខាងមុខនេះ លោក ដូណាល់ ត្រាំ ត្រូវបានគេមើលឃើញថា បាននិងកំពុងយកវេទនាឃោសនា ស្ទើរគ្រប់កន្លែងរបស់លោក វាយប្រហារទៅលើប្រទេសចិន៕