(ព្រុចសែល)៖ សភាអឺរ៉ុប (EP) នៅថ្ងៃសុក្រសប្តាហ៍នេះបានអនុម័តច្បាប់ថ្មី ដើម្បីអនុញ្ញាតឱ្យការអភិវឌ្ឍវ៉ាក់សាំងដើម្បីប្រឆាំងវីរុសកូរ៉ូណា (COVID-19) បានកាន់តែលឿន។ នេះបើតាមការចេញផ្សាយ ដោយទីភ្នាក់ងារព័ត៌មានស៊ីនហួរ នៅព្រឹកថ្ងៃសៅរ៍ ទី១១ ខែកក្កដា ឆ្នាំ២០២០។

បើតាមសេចក្តីប្រកាសព័ត៌មានរបស់សភាអឺរ៉ុប (EP) បានឱ្យដឹងថា ច្បាប់ថ្មីនេះនឹងលើកលែងជាបណ្តោះអាសន្ន លើវិធីសាស្ត្រមួយចំនួនលើការសាកល្បងវ៉ាក់សាំង ដោយទទួលបានសំឡេងគាំទ្រ ៥០៥សំឡេង, ប្រឆាំង ៦៧សំឡេង និងអនុប្បវាទ ១០៩សំឡេងបន្ទាប់ពីការជជែកដេញដោលជាបន្ទាន់មួយ ត្រូវបានធ្វើឡើងកាលពីសប្តាហ៍មុន។

គណៈកម្មការអឺរ៉ុបកាលពីខែមិថុនាកន្លងទៅនេះ បានលើកឡើងនូវយុទ្ធសាស្ត្រថ្មី នៅក្នុងការផលិតវ៉ាក់សាំង ដោយស្នើសុំឲ្យមានការផ្អាកអនុវត្តច្បាប់ហាមឃាត់ មួយចំនួនទៅលើការធ្វើតេស្តវ៉ាក់សាំងតាមគ្លីនិក ឬក៏ព្យាបាលអ្នកជំងឺ COVID-19 តាមរយៈការកែប្រែហ្សែនលើសារពាង្គ ដោយបច្ចេកទេសវិស្វកម្ម (GMOs)។

គួរបញ្ជាក់ថា ដោយសារតែរដ្ឋជាសមាជិកនីមួយៗនៅសហភាពអឺរ៉ុប តែងតែតម្រូវឱ្យមានការវាយតម្លៃពីហានិភ័យ នៃការព្យាបាលសាកល្បងលើឱសថ និងការតេស្តវ៉ាក់សាំងតាមវិធី GMOs ជាហេតុធ្វើឱ្យមានការពន្យារពេល លើកការធ្វើតេស្តវ៉ាក់សាំងកន្លងមកនេះ។ ដូច្នេះច្បាប់ថ្មីរបស់អឺរ៉ុបនេះ ត្រូវបានគេរំពឹងថា នឹងជួយសម្រួលក៏ដូចជាការកាត់ពេលវេលា ក្នុងការអភិវឌ្ឍវ៉ាក់សាំង ដើម្បីសង្គ្រោះជិវិតមនុស្សឱ្យទាន់ពេលវេលា៕