(ញូដេលី)៖ នៅក្នុងរបាយការណ៍ប្រចាំថ្ងៃស្តីពីករណីឆ្លង និងស្លាប់ដោយសារ COVID-19 សម្រាប់ថ្ងៃសុក្រនេះ ឥណ្ឌាបានបំបែកកំណត់ត្រាសាជាថ្មីម្តងទៀតហើយ ដោយមានអ្នកឆ្លងថ្មីៗរហូតដល់ ១០,៩៥៦នាក់ និងអ្នកស្លាប់ថ្មីចំនួន ៣៩៦នាក់ ក្នុងរយៈពេលតែ ២៤ម៉ោងប៉ុណ្ណោះ។ នេះបើតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ នារសៀលថ្ងៃសុក្រ ទី១២ ខែមិថុនា ឆ្នាំ២០២០។

តួលេខខាងលើនេះ គឺខ្ពស់បំផុតពុំធ្លាប់មាននោះឡើយទាំងករណីឆ្លង និងករណីស្លាប់ថ្មីៗប្រចាំថ្ងៃនៅក្នុងប្រទេសអាស៊ីខាងត្បូងមួយនេះ។ ពោលនេះជាលើកទី១ ហើយដែលឥណ្ឌាបានរាយការណ៍ករណីឆ្លងថ្មីៗលើស ១០,០០០ករណី ក្នុងរយៈពេលតែមួយថ្ងៃប៉ុណ្ណោះ។

បើបូកបន្ថែមលើតួលេខខាងលើ វាធ្វើឲ្យចំនួនករណីឆ្លងសរុបនៅទូទាំងប្រទេសឥណ្ឌា កើនដល់ ២៩៧,៥៣៥ករណី ក្នុងនោះអ្នកជំងឺ ៨,៤៩៨នាក់បានស្លាប់ និង ១៤១,១៩៥នាក់ទៀតបានជាសះស្បើយឡើងវិញ។ ប្រការនេះវាបានធ្វើឲ្យតួលេខនៃអ្នកជំងឺសកម្ម ឬអ្នកជំងឺដែលកំពុងតែសម្រាកព្យាបាល នៅក្នុងមន្ទីរពេទ្យនាពេលបច្ចុប្បន្នមានចំនួន ១៤១,៨៤២នាក់។

គួរបញ្ជាក់ថា នៅចំពោះមុខវិបត្តិសកលមួយនេះ នាយករដ្ឋមន្ត្រីឥណ្ឌាលោក ណារិនដ្រា ម៉ូឌី បានប្រកាសដាក់ចេញវិធានការ បិទទ្វារប្រទេសតាំងពីថ្ងៃទី២៥ ខែមីនាមកម្ល៉េះ ដើម្បីទប់ទល់ការឆ្លងរាលដាលនៃជំងឺ COVID-19 ហើយការបន្តបិទនៅតំណាក់កាលទី ៥ ទើបតែត្រូវបានប្រកាសកាលពីថ្ងៃទី០១ ខែមិថុនា។ ទោះជាបែបនេះក្តី ស្ថានការណ៍ COVID-19 នៅក្នុងប្រទេស ដែលមានចំនួនប្រជាជនច្រើនជាងគេបំផុតលំដាប់ទី ២ លើលោកមួយនេះ ហាក់មិនទាន់ធូរស្រាយនៅឡើយទេ និងកាន់តែកើនឡើងថែមទៀត៕