(អារ៉ាប់)៖ ក្នុងឆ្នាំនេះមិនមែនតែប្រទេសចិន និងសហរដ្ឋអាមេរិកនោះទេ ដែលត្រូវបញ្ជូនយានអវកាសឆ្ពោះទៅភពអង្គារ (Mars) ប្រទេសអារ៉ាប់មួយ ក៏កំពុងត្រៀមខ្លួនធ្វើរឿងអស្ចារ្យជាប្រវត្តិសាស្ត្រនេះដែរ។ នេះបើតាមការចេញផ្សាយ​ដោយសារព័ត៌មាន BBC នៅព្រឹកថ្ងៃអង្គារ ទី០៩ ខែមិថុនា ឆ្នាំ២០២០។

ប្រទេសអារ៉ាប់នោះគឺអេមីរ៉ាត់អារ៉ាប់រួម ហើយវានឹងជាបេសកកម្មដំបូងបំផុត​សម្រាប់តំបន់អារ៉ាប់ទាំងមូល​នៃការបញ្ជូនយានផ្កាយរណបទៅកាន់ភពព្រះអង្គារ។ យានអវកាសដែលប្រទេសអេមីរ៉ាត់អារ៉ាប់រួម គ្រោងបញ្ជូនទៅគឺជាប្រភេទផ្កាយរណបឈ្មោះ អាម៉ាល់ (Amal) មានន័យថា «ក្តីសង្ឃឹម»។

យាន Amal នឹងត្រូវបាញ់បង្ហោះ​ចេញពីប្រទេសជប៉ុន ដោយប្រើគ្រាប់រ៉ុក្កែតរបស់ជប៉ុន នៅថ្ងៃទី១៤ ខែកក្កដា ខាងមុខ គឺនៅពេលមិនសូវខុសគ្នាជាមួយ សហរដ្ឋអាមេរិក និងប្រទេសចិនឡើយ ព្រោះវាជាចន្លោះពេលដែលភពយើង និងភពអង្គារគោចរមកដល់គន្លងកៀកគ្នាបំផុត។

យាន Amal នឹងត្រូវចំណាយពេលធ្វើដំណើរចម្ងាយ ៤៩៣លានគីឡូម៉ែត្រ ដើម្បីទៅដល់ភពអង្គារ ហើយចាប់ផ្តើមការគោចរជុំវិញភពក្រហមនោះ ដើម្បីប្រមូលទិន្នន័យពាក់ព័ន្ធអាកាសធាតុ និងបរិយាកាសរបស់ Mars។ វានឹងនៅគោចរជុំវិញភពអង្គារពេញមួយឆ្នាំនៅទីនោះ ដែលស្មើនឹង ៦៨៧ថ្ងៃនៅលើភពផែនដី ដើម្បីប្រមូលទិន្ន័យឲ្យបានគ្រប់គ្រាន់។

គួរជម្រាបថា ប្រសិនបើយាន Amal ឬ Hope នេះទៅដល់ភពអង្គារមែន វានឹងទៅដល់ឆ្នាំតែមួយ​ដែលអេមីរ៉ាត់អារ៉ាប់រួមប្រារព្ធខួប ៥០ឆ្នាំនៃការបង្កើតប្រទេសរបស់ខ្លួន​កាលពីឆ្នាំ១៩៧១។ នេះមិនមែនជាលើកដំបូងឡើយ​ដែលប្រទេសអារ៉ាប់មួយនេះ ប្រឡូកចូលក្នុងវិស័យអវកាស។ កន្លងមកអេមីរ៉ាត់អារ៉ាប់រួមធ្លាប់បញ្ជូនគ្រាប់រ៉ុក្កែតឡើងទីអវកាស និងបញ្ជូនអវកាសយានិកខ្លួន​ឡើងទៅស្ថានីយអវកាសអន្តរជាតិ ISS ផងដែរ៕