(វ៉ាស៊ីនតោន)៖ អតីតប្រធានាធិបតីស្បែកខ្មៅតែមួយគត់ ក្នុងប្រវត្តិសាស្ត្រអាមេរិកលោក បារ៉ាក់ អូបាម៉ា បានបង្ហាញការគំាទ្រ និងកោតសរសើរយ៉ាងខ្លាំង ចំពោះយុវជនអាមេរិកទាំងឡាយ ដែលបាននិងកំពុងចូលរួមបាតុកម្ម ទាមទាររកយុត្តិធម៌ចំពោះអំពើរើសអើងពូជសាសន៍ ជាមួយការសង្កត់ធ្ងន់ធ្ងរថា បាតុកម្មជុំវិញការស្លាប់របស់បុរសស្បែកខ្មៅ កំឡុងត្រូវប៉ូលិសឃាត់ខ្លួនកាលពីសប្ដាហ៍មុន នឹងជំរុញឱ្យមានការធ្វើកំណែទម្រង់ស្ថាប័នប៉ូលិសទូទាំងប្រទេស។ នេះបើតាមការចេញផ្សាយ ដោយសារព័ត៌មាន CNA នៅព្រឹកថ្ងៃព្រហស្បតិ៍ ទី០៤ ខែមិថុនា ឆ្នាំ២០២០។

លោក អូបាម៉ា ធ្វើការកត់សម្គាល់ខាងលើ នៅក្នុងបទអត្ថាធិប្បាយតាមវីដេអូជាលើកដំបូង ចាប់តាំងពីការស្លាប់របស់បុរសស្បែកខ្មៅ ចច ហ្វ្លយដ៍ (George Floyd) កាលពីថ្ងៃទី២៥ ខែឧសភា។ អតីតប្រធានាធិបតីអាមេរិកស្បែកខ្មៅរូបនេះ បានគូសបញ្ជាក់យ៉ាងដូច្នេះថា «ជាញឹកញប់អំពើហិង្សាខ្លះ កើតចេញពីក្រុមមនុស្សដែលត្រូវបានគេសន្មត់ថា ជាអ្នកបម្រើ និងការពារពួកអ្នក។ ខ្ញុំចង់ឱ្យអ្នកទាំងអស់គ្នាដឹងថា ពួកអ្នកពិតជាសំខាន់។ ខ្ញុំចង់ឱ្យអ្នកទាំងអស់គ្នាដឹងថាជីវិតរបស់អ្នក និងក្ដីសុបិនរបស់អ្នកពិតជាសំខាន់»។

គួរបញ្ជាក់ថា ដោយមិនបានលើកឡើងពីឈ្មោះប្រធានាធិបតីអាមេរិកលោក ដូណាល់ ត្រាំ ឲ្យចំៗនោះ លោក បារ៉ាក់ អូបាម៉ា ក៏បានអំពាវនាវឱ្យមានការធ្វើកំណែទម្រង់នៅក្នុង ស្ថាប័នប៉ូលិសទូទាំងប្រទេសផងដែរ។ លោក អូបាម៉ា បានសង្កត់ធ្ងន់បន្ថែមយ៉ាងដូច្នេះថា «ខ្ញុំជំរុញឱ្យអភិបាលក្រុងទាំងអស់នៅក្នុងប្រទេសមួយនេះ ពិនិត្យឡើងវិញនូវ ការប្រើប្រាស់កម្លាំងប៉ូលិសរបស់អ្នក និងធ្វើកំណែទម្រង់ផងដែរ»៕