(សេអ៊ូល)៖ ក្នុងរយៈពេល ២៤ម៉ោងកន្លងទៅនេះ​អាជ្ញាធរសុខាភិបាលកូរ៉េខាងត្បូង​បានកត់ត្រាករណីឆ្លងថ្មីៗនៃជំងឺ COVID-19 ចំនួន ២៧នាក់បន្ថែមទៀត ដែលនាំឲ្យចំនួនករណីឆ្លងសរុប នៅក្នុងប្រទេសអាស៊ីបូព៌ាមួយនេះកើនដល់ ១១,០១៨ករណី។ នេះបើតាមការចេញផ្សាយដោយ ទីភ្នាក់ងារព័ត៌មានស៊ីនហួរ នារសៀលថ្ងៃសុក្រ ទី១៥ ខែឧសភា ឆ្នាំ២០២០។

បើតាមមជ្ឈមណ្ឌលគ្រប់គ្រង និងបង្ការជំងឺឆ្លងរបស់កូរ៉េខាងត្បូង KCDC បានគូសបញ្ជាក់ថា ក្នុងចំណោមករណីឆ្លងថ្មីខាងលើនេះមាន ២២នាក់ ជាករណីឆ្លងនៅក្នុងស្រុក និង ០៥នាក់ទៀតជាករណីនាំចូលពីបរទេស។ ទោះជាយ៉ាងណា នៅថ្ងៃដដែលនេះមិនមានករណីស្លាប់ត្រូវបានរាយការណ៍ទេ ខណៈចំនួនអ្នកស្លាប់សរុបនៅរក្សាបានត្រឹម ២៦០នាក់ ឬស្មើនឹង ២.៣៦% នៃចំនួនអ្នកជំងឺសរុបទាំងអស់។

ដោយឡែកសម្រាប់របាយការណ៍ ស្តីអំពីតួលេខសរុបនៃអ្នកជាសះស្បើយឡើងវិញ អាជ្ញាធរសុខាភិបាលកូរ៉េខាងត្បូងក៏បានបញ្ជាក់ដែរថា បានកើនដល់ ៩,៨២១នាក់ហើយ ឬស្មើនឹង ៨៩.១% នៃចំនួនអ្នកជំងឺសរុបបន្ទាប់ពីអ្នកជំងឺចំនួន ៥៩នាក់បន្ថែមទៀត ទើបតែបានព្យាបាលឲ្យជាសះស្បើយ កាលពីថ្ងៃព្រហស្បតិ៍ ទី១៤ ខែឧសភា។

គួរបញ្ជាក់ថា ថ្ងៃសុក្រនេះជាថ្ងៃទី ៦ជាប់ៗគ្នាមកហើយ ដែលអត្រាអ្នកឆ្លងថ្មីប្រចាំថ្ងៃនៃជំងឺ COVID-19 នៅក្នុងប្រទេសមួយនេះ បានហក់ឡើងមកក្បែរខ្ទង់ ៣០ករណីវិញ បន្ទាប់ពីបានស្គាល់អត្រាអ្នកឆ្លងប្រចាំថ្ងៃក្នុងរង្វង់ ១០ករណីជិតមួយខែកន្លងទៅ។ បញ្ហានេះ វាបានកើតឡើងដោយសារតែ មានការឆ្លងរីលរាលដាលជាចង្កោមថ្មីមួយ នៅសង្កាត់ អ៉ីថេវ៉ុន (Itaewon) នៃទីក្រុងសេអ៊ូល តាមរយៈបុរសម្នាក់ដែលមានផ្ទុកជំងឺនេះ ហើយបានទៅចូលលេងក្លឹបកម្សាន្ត ជាច្រើនកន្លែងក្នុងសង្កាត់នោះ។

សម្រាប់ការធ្វើតេស្ត និងតាមដានរកករណីសង្ស័យនៃការឆ្លងជំងឺ COVID-19 ក៏កំពុងត្រូវបានធ្វើឡើងយ៉ាងសកម្មផងដែរ ទៅលើក្រុមមនុស្សដែលបានចូលក្លឹបកម្សាន្ត នៅក្នុងទីក្រុងសេអ៊ូល ខណៈការព្រួយបារម្ភកំពុងកើនឡើង ជុំវិញជំងឺរាតត្បាតសកល ដែល អាចនឹងផ្ទុះការឆ្លងខ្លាំងឡើងវិញ ដោយសារតែករណីដែលបានកើនឡើង នារយៈពេលប៉ុន្មានថ្ងៃចុងក្រោយនេះ។

គិតចាប់តាំងពីថ្ងៃទី០៣ ខែមករាមក កូរ៉េខាងត្បូងបានធ្វើតេស្តរក COVID-19 លើមនុស្សច្រើនជាង ៧២៦,០០០នាក់ហើយ ក្នុងចំណោមនោះ ៦៧៩,៨៥៤នាក់ មានលទ្ធផលអវិជ្ជមាន ខណៈ ១៩,៨៧៥នាក់កំពុងស្ថិតក្នុងការតាមដាន៕