(សិង្ហបុរី)៖ នារសៀលថ្ងៃសៅរ៍នេះ សិង្ហបុរីបានប្រកាសពីការរកឃើញករណីឆ្លង COVID-19 ចំនួន៦១៨ករណីថ្មី ដែលធ្វើឲ្យចំនួនអ្នកឆ្លង សរុបកើនដល់១២,៦៩៣នាក់។ នេះបើតាមការដកស្រង់ការផ្សាយចេញពីសារព័ត៌មាន CNA នៅថ្ងៃសុក្រ ទី២៤ ខែមេសា ឆ្នាំ២០២០។

តួលេខខាងលើគឺជាការបន្តធ្លាក់ចុះមកវិញ បើធៀបទៅនឹងតួលេខអ្នកឆ្លងថ្មីនៅសិង្ហបុរី ក្នុងរយៈពេល០៤ថ្ងៃកន្លងទៅនាដើមសប្តាហ៍នេះ ដែលមានចំនួន ច្រើនជាង១,០០០នាក់ ខណៈកាលពីថ្ងៃសុក្រម្សិលមិញមានជិត៩០០នាក់។ យោងទៅតាមក្រសួងសុខាភិបាលសិង្ហបុរី ក្នុងចំណោមករណីថ្មីៗទាំងនោះ មាន៧ករណីប៉ុណ្ណោះដែលជាពលរដ្ឋសិង្ហបុរី ឬអ្នកមានទីលំនៅអចិន្រ្តៃយ៍ ដោយករណីដទៃទៀតគឺជា ពលករកាន់ប័ណ្ណបម្រើការងាររយៈពេលវែង ដែលស្ថិតក្នុងកន្លែងស្នាក់នៅសម្រាប់ពលករបរទេស។

គួរជម្រាបថា ទីតាំងស្នាក់នៅសម្រាប់ពលករបរទេសសរុប២៥កន្លែងនៅសិង្ហបុរី ត្រូវបានចាត់ទុកជា កន្លែងដាក់ឲ្យនៅដាច់ដោយឡែក។ នៅចំពោះមុខការកើនឡើងនៃចំនួនករណីឆ្លងក្នុងប្រទេសសិង្ហបុរី នាយករដ្ឋមន្រ្តីសិង្ហបុរីលោកលី សៀន ឡុង (Lee Hsien Loong) កាលពីថ្ងៃអង្គារសប្តាហ៍នេះបានប្រកាសថា សិង្ហបុរីនឹងបន្តអនុវត្តវិធានការ «បិទប្រទេសមួយផ្នែក» រហូតដល់ថ្ងៃទី១ ខែមិថុនា ដើម្បីទប់ទល់នឹងការឆ្លងរាតត្បាតនៃជំងឺ COVID-19៕