(ញូយ៉ក)៖ ក្រុមហ៊ុនបច្ចេកវិទ្យាវេជ្ជសាស្ត្រ Kinsa Health បានឱ្យដឹងថា វិធានការរឹតត្បិត ក្នុងនោះរួមមានទាំងការបង្គាប់ឱ្យប្រជាជនស្ថិតនៅក្នុងផ្ទះ រីឯភោជនីយដ្ឋានត្រូវបិទទ្វារ បាន និងកំពុងចូលរួមចំណែកក្នុងការជួយពន្យឺតការឆ្លងជំងឺ COVID-19 ដែលបានឆ្លងរាលដាលគ្រប់រដ្ឋទាំងអស់នៅក្នុងសហរដ្ឋអាមេរិក។ នេះបើតាមការចេញផ្សាយដោយ សារព័ត៌មាន CNA នៅថ្ងៃអង្គារ ទី៣១ ខែមីនា ឆ្នាំ២០២០។

ប្រជាជនអាមេរិក ២៤៨លាននាក់ នៅក្នុងរដ្ឋចំនួន ២៩ ត្រូវបានបង្គាប់ឱ្យស្ថិតនៅក្នុងផ្ទះ ខណៈអាជ្ញាធរសុខាភិបាលអាមេរិក នៅតែពិបាកបញ្ជាក់ថាវិធានការនេះ និងវិធានការ ដទៃទៀតមានប្រសិទ្ធភាពពន្យឺតការឆ្លង COVID-19 ដោយរបៀបណា។ ប៉ុន្តែ បើតាមទិន្នន័យថ្មីមួយរបស់ក្រុមហ៊ុន Kinsa ផ្អែកលើពេលវេលាជាក់ស្ដែង វិធានការគម្លាតសង្គម ឬនៅ ឆ្ងាយពីគ្នា បាននិងកំពុងដំណើរការទៅមុខ ហើយអាចកាត់បន្ថយចំនួនអ្នកជំងឺច្រើនលើសលប់នៅតាមមន្ទីរពេទ្យបានមួយផ្នែក និងធ្វើឱ្យអត្រាស្លាប់មានកំរិតទាបផងដែរ។

ប្រសិទ្ធភាពនៃវិធានការស្ថិតនៅក្នុងផ្ទះ ព្រមទាំងវិធានការគម្លាតសង្គម ក៏បានបងា្ហញរឹតតែច្បាស់ផងដែរ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានប្រកាសអូសបន្លាយពេលនៃការអនុវត្តវិធានការទាំងនេះរហូតដល់ចុងខែមេសា ឆ្នាំ២០២០ ជាមួយការផ្ដល់អនុសាសន៍ឱ្យប្រជាជនអាមេរិកស្ថិតនៅក្នុងផ្ទះ។ លោក បន្តថាលោកមានផែនការដកចេញការរឹតត្បិតវិញ នៅថ្ងៃបុណ្យ Easter ហើយនឹងបញ្ជូនប្រជាជនអាមេរិកឱ្យត្រឡប់ទៅធ្វើការវិញ។

យ៉ាងណាមិញ តួលេខចុងក្រោយពីសាកលវិទ្យាល័យអាមេរិក ចន ហប់ឃីនស៍ (Johns Hopkins) ដែលមានតួនាទីតាមដានជាប្រចាំលើស្ថានការណ៍ COVID-19 ទាំងនៅសហរដ្ឋអាមេរិក និងទូទាំងពិភពលោកបានឲ្យដឹងថា ពេលនេះចំនួនមនុស្សស្លាប់ ដោយសារតែជំងឺរាតត្បាតសកលនេះ នៅទូទាំងប្រទេសមហាអំណាចមួយនេះ បានកើនឡើងដល់ ៣,០០៨នាក់ ក្នុងចំណោមអ្នកឆ្លងសរុប ១៦៣,៤២៩ករណី៕