(សិង្ហបុរី)៖ អង្គការសុខភាពពិភពលោក WHO បានឱ្យដឹងថា កិច្ចប្រជុំពាណិជ្ជកម្មមួយ នៅឯសណ្ឋាគារ Grand Hyatt ក្នុងប្រទេសសិង្ហបុរី ដែលមានជាប់ពាក់ព័ន្ធនឹងករណីឆ្លងវីរុសកូរ៉ូណា 2019-nCoV ក្នុងប្រទេសកូរ៉េខាងត្បូង និងម៉ាឡេស៊ី មានមនុស្សចូលរួម១០៩នាក់ ហើយពួកគេទាំងអស់ជាបុគ្គល មកពីក្រុមហ៊ុនអន្តរជាតិមួយ។ នេះបើតាមការចេញផ្សាយដោយសារព័ត៌មាន CNA នៅថ្ងៃព្រហស្បតិ៍ ទី០៦ ខែកុម្ភៈ ឆ្នាំ២០២០។

ដោយមិនបានបញ្ជាក់ពីឈ្មោះក្រុមហ៊ុនខាងលើ អង្គការ WHO បានបញ្ជាក់ទៀតថា អ្នកចូលរួម ក្នុងកិច្ចប្រជុំនៅឯសណ្ឋាគារ Grand Hyatt ពីថ្ងៃទី២០ ដល់ថ្ងៃទី២២ ខែមករា កន្លងទៅ មាន១៥នាក់ ជាពលរដ្ឋសិង្ហបុរី និង៩៤នាក់ មកពីបរទេស។ ពលរដ្ឋសិង្ហបុរី ៤នាក់ក្នុងចំណោម១៥នាក់ ត្រូវបានគេរាយការណ៍ថា បានបង្ហាញរោគសញ្ញាគួរឱ្យសង្ស័យ និងកំពុងស្ថិតនៅក្រោមការត្រួតពិនិត្យសុខភាព ខណៈ១១នាក់ ផ្សេងទៀតមាន សុខភាពល្អប្រសើរ។

ម៉ាឡេស៊ី និងសិង្ហបុរី ក៏បានទទួលស្គាល់ពីករណីឆ្លងវីរុសកូរ៉ូណា មានជាប់ពាក់ព័ន្ធនឹងកិច្ចប្រជុំនោះដែរ ដោយអាជ្ញាធរម៉ាឡេស៊ី កាលពីថ្ងៃអង្គារ បាននិយាយថា បុរសជាពលរដ្ឋរបស់ខ្លួនម្នាក់ មានអាយុ៤២ឆ្នាំ ដែលបានចូលរួមកិច្ចប្រជុំ នៅឯសណ្ឋាគារ Grand Hyatt បានបង្ហាញរោគសញ្ញា នៅថ្ងៃទី២៩ ខែមករា ហើយត្រូវបានគេធ្វើតេស្ដរកឃើញវីរុសកូរ៉ូណា នៅថ្ងៃទី០៣ ខែកុម្ភៈ។ ចំណែកឯ កូរ៉េខាងត្បូងវិញ បានអះអាងថាពលរដ្ឋ របស់ខ្លួនពីរនាក់ នោះគឺបុរសម្នាក់មានអាយុ ៣៨ឆ្នាំ និងម្នាក់ អាយុ៣៦ឆ្នាំ ដែលបានចូលរួមក្នុងកិច្ចប្រជុំនេះ ក៏បានឆ្លងវីរុសកូរ៉ូណាផងដែរ។

គួរជម្រាបថា បើតាមអាជ្ញាធរម៉ាឡេស៊ី មនុស្សដែលបានចូលរួមក្នុងកិច្ចប្រជុំ នៅសណ្ឋាគារ Grand Hyatt មានម្នាក់មកពីទីក្រុង វូហាន ហើយអ្នកនាំពាក្យ សណ្ឋាគារ Grand Hyatt បានទទួលស្គាល់ថា បុរសម៉ាឡេស៊ីខាងលើ ពិតជាបានស្នាក់នៅក្នុងសណ្ឋាគាររបស់ខ្លួន រយៈពេលមួយសប្ដាហ៍ ក្នុងពាក់កណ្ដាលខែមករា ប្រាកដមែន ហើយសណ្ឋាគារ ត្រូវបានសម្អាតយ៉ាងស្អាត។ ប៉ុន្តែមិនបានដឹងថាមានករណីឆ្លងវីរុសកូរ៉ូណា លើភ្ញៀវ ឬបុគ្គលិករបស់ខ្លួនណា ម្នាក់នោះទេ។ គិតត្រឹម ថ្ងៃព្រហស្បត្តិ៍ ទី០៦ ខែកុម្ភៈនេះ ចំនួនមនុស្សស្លាប់ដោយសារវីរុសកូរ៉ូណាថ្មី 2019-nCoV ក្នុងប្រទេសចិន បានកើនឡើងដល់៥៦៣នាក់ហើយ ខណៈមនុស្សរហូតដល់ ២៨,០១៨នាក់បានឆ្លង៕