(ម៉ូស្គូ)៖ ប្រធានាធិបតីរុស្ស៊ីលោក វ៉្លាឌីមៀ ពូទីន នាថ្ងៃពុធនេះបាននិយាយថា លោកពុំមានបំណងក្នុងការព្យាយាមកែប្រែរដ្ឋធម្មនុញ្ញ ដើម្បីអាចឲ្យលោកបន្តកាន់អំណាច ០៣អាណត្តិជាប់គ្នាឡើយ។ នេះបើតាមការដកស្រង់ការផ្សាយ ចេញពីសារព័ត៌មាន Sputnik នៅល្ងាចថ្ងៃពុធ ទី១៥ ខែមករា ឆ្នាំ២០២០។

កំឡុងការថ្លែងសារប្រចាំឆ្នាំ នៅចំពោះមុខសភាប្រទេសរុស្ស៊ីនាថ្ងៃពុធនេះ លោក ពូទីន បានបង្ហាញជំហរគាំទ្រដល់គោលការណ៍ ហាមប្រាមប្រធានាធិបតី មិនឲ្យកាន់អំណាច ០៣អាណត្តិជាប់ៗគ្នា ដូចមានចែងនៅក្នុងរដ្ឋធម្មនុញ្ញរបស់រុស្ស៊ី។ កន្លងមកនេះមានការសង្ស័យថា លោកអាចនឹងកែប្រែរដ្ឋធម្មនុញ្ញ ដើម្បីបន្តកាន់អំណាចនៅអាណត្តិថ្មីឆ្នាំ២០២៤ បន្ទាប់ពីលោកបានលើកឡើងថា ការដាក់កំហិតមិនឲ្យប្រធានាធិបតីម្នាក់ កាន់អំណាចបានច្រើនអាណត្តិជាប់ៗគ្នា អាចត្រូវលុបចេញវិញប្រសិនបើប្រជាជនរុស្ស៊ីមូលមតិគ្នាគាំទ្រ។

គួរជម្រាបថា លោក វ៉្លាឌីមៀ ពូទីន បានបន្តជាប់ឆ្នោតជាប្រធានាធិបតីរុស្ស៊ី សម្រាប់អាណត្តិទីពីរជាប់គ្នាកាលពីឆ្នាំ២០១៨ ខណៈការបោះឆ្នោត ជ្រើសរើសប្រធានាធិបតីអាណត្តិក្រោយ នឹងត្រូវធ្វើឡើងនៅខែមីនា ឆ្នាំ២០២៤ គឺមួយអាណត្តិមានរយៈពេល០ ៦ឆ្នាំ។ ដោយឡែក លោក ពូទីន មិនមែន បានជាប់ឆ្នោតលើកដំបូងជាប្រធានាធិបតីរុស្ស៊ីនៅឆ្នាំ២០១២ នោះទេ គឺលោកធ្លាប់បានកាន់តំណែងនេះ ០២អាណត្តិរួចមកហើយចាប់ពីឆ្នាំ២០០០ ដល់ឆ្នាំ២០០៨ ដែលកាលនោះមួយអាណត្តិមានរយៈពេលត្រឹម ០៤ឆ្នាំប៉ុណ្ណោះ៕