(វ៉ាស៊ីនតោន)៖ ប្រធានសភាតំណាងរាស្រ្តអាមេរិក លោកស្រី Nancy Pelosi បានអញ្ជើញប្រធានាធិបតីអាមេរិក លោក ដូណាល់ ត្រាំ ឲ្យធ្វើការថ្លែងសារប្រចាំឆ្នាំរបស់លោកនៅក្នុងសភា ដែលត្រូវប្រព្រឹត្តទៅនៅថ្ងៃទី០៤ ខែកុម្ភៈ ឆ្នាំ២០២០ ហើយលោក ត្រាំ ក៏​បានយល់ព្រមផងដែរ។ នេះបើតាមការដកស្រង់ការផ្សាយចេញផ្សាយសារព័ត៌មាន CGTN នៅព្រឹកថ្ងៃអាទិត្យ ទី២២ ខែធ្នូ ឆ្នាំ២០១៩។

ការថ្លែងសារខាងលើទំនងជានឹងត្រូវធ្វើឡើងកំឡុង ឬមួយក៍ក្រោយការបើកសវនាការជំនុំជម្រះ ជាលើកចុងក្រោយនៅព្រឹទ្ធសភា ដើម្បីសម្រេចថា តើលោក ដូណាល់ ត្រាំ «គួរតែត្រូវទម្លាក់ ឬក៏មិនត្រូវទម្លាក់ពីតំណែង»។ ក៏ប៉ុន្តែបើតាមការវិភាគ លោក ត្រាំ ច្បាស់ជានឹងរួចខ្លួន ដ្បិតព្រឹទ្ធសភាអាមេរិកកំពុងស្ថិតក្រោមការគ្រប់គ្រងរបស់គណបក្សសាធារណរដ្ឋ ដែលឈរនៅខាងលោក។ យ៉ាងណាមិញ លោកស្រី Pelosi នៅមិនទាន់និយាយត្រូវគ្នាជាមួយថ្នាក់ដឹកនាំបក្សសាធារណរដ្ឋនៅព្រឹទ្ធសភា ជុំវិញការរៀបចំសវនាការ​​ស្តីពីនីតិវិធីដកលោក ត្រាំ​ ពីតំណែងនៅឡើយទេ ហើយកាលបរិច្ឆេទដើម្បីបើកសវនាការក៏មិនទាន់ត្រូវបានកំណត់ដែរ។

ដោយឡែក បន្ទាប់ពីលោកស្រី Pelosi សរសេរលិខិតមួយច្បាប់ដើម្បីអញ្ជើញលោក ដូណាល់ ត្រាំ ឲ្យថ្លែងសារ State of the Union ដែលនឹង​​រៀបចំឡើងនៅក្នុងសភាតំណាងរាស្រ្ត ជាទីដែលបានបោះឆ្នោតគាំទ្រឲ្យចោទប្រកាន់រូបលោកជាផ្លូវការ ដើម្បីចាប់ផ្តើមនីតិវិធីដក​តំណែងនោះ អ្នកនាំពាក្យសេតវិមានលោក Hogan Gidley បានឲ្យដឹងថា លោកប្រធានាធិបតីអាមេរិកបានយល់ព្រមចំពោះការ​អញ្ជើញរបស់លោកស្រីប្រធានសភា។

គួរជម្រាបថា កំឡុងការថ្លែងសាររបស់លោក ត្រាំ ក្នុងឆ្នាំ២០១៩នេះ លោកស្រី Pelosi ត្រូវគេមើលឃើញថា ហាក់បានឌីដងដាក់​លោក ដូណាល់ ត្រាំ ជាមួយការទះដៃបែបចំអកចំពោះលោក ហើយទំនាក់ទំនងរវាងអ្នកទាំងពីរបានបន្តធ្លាក់ចុះដុនដាប កាន់តែខ្លាំងថែមទៀត​ចាប់តាំងពីពេលនោះមក រហូតដល់ថ្នាក់ទាស់សម្តីគ្នានៅក្នុងសេតវិមាន និងការបង្ហោះសារលើបណ្តាញសង្គម Twitter ទិតៀនគ្នា​ជាដើម៕