(ព្យុងយ៉ាង)៖ ប្រមុខដឹកនាំកំពូលរបស់ប្រទេសកូរ៉េខាងជើងគឺ លោក គីម ជុងអ៊ុន បានបើកកិច្ចប្រជុំមួយជាមួយក្រុមមន្រ្តីយោធា​ជាន់ខ្ពស់របស់លោក ដើម្បីពិភាក្សាអំពីកិច្ចប្រឹងប្រែងពង្រឹងសមត្ថភាពយោធារបស់កូរ៉េខាងជើង។ នេះបើតាមសេចក្តីរាយការណ៍​របស់ទីភ្នាក់ងារព័ត៌មានរដ្ឋកូរ៉េខាងជើង KNCA ដកស្រង់ការផ្សាយដោយសារព័ត៌មាន Japan Times នាព្រឹកថ្ងៃអាទិត្យ ទី២២ ខែធ្នូ ឆ្នាំ២០១៩។

យោងតាមសេចក្តីរាយការណ៍របស់ទីភ្នាក់ងារព័ត៌មាន KCNA កិច្ចប្រជុំខាងលើបានជជែកនិងពិចារណាអំពីចំណាត់ការនយោបាយ​និងវិធានការនៃការដឹកនាំ​ ព្រមទាំងយុទ្ធសាស្រ្តយោធាសំខាន់ៗ សម្រាប់ពង្រឹងក៏ដូចជាពន្លឿនការអភិវឌ្ឍសមត្ថភាពការពារជាតិ​របស់ប្រទេសកូរ៉េខាងជើង។ នាឱកាសនោះ លោក គីម ជុងអ៊ុន ក៏បានលើកឡើងនូវស្ថានការណ៍ស្មុគស្មាញផ្ទៃក្នុង និងនៅផ្នែក​ខាងក្រៅផងដែរ។ យ៉ាងណាមិញ ទីភ្នាក់ងារព័ត៌មានកូរ៉េខាងជើង KCNA មិនបានបញ្ជាក់ច្បាស់ថា កិច្ចប្រជុំនេះបានប្រព្រឹត្តទៅ​​កាលពីពេលណាឲ្យប្រាកដឡើយ។

គួរជម្រាបថា បើតាម KCNA ក្នុងពេលឆាប់ៗខាងមុខ កូរ៉េខាងជើងទំនងជានឹងបើកកិច្ចប្រជុំបក្សធំមួយ ដើម្បីជជែកនិងសម្រេច​អំពី​បញ្ហាសំខាន់ៗរួមជាមួយការប្រែប្រួលនៃស្ថានការណ៍ទាំងនៅក្នុងនិងក្រៅប្រទេស។ ខណៈនេះ អ្នកវិភាគកំពុងមានក្តីព្រួយបារម្ភថា កូរ៉េខាងជើងអាចងាកទៅរកការបាញ់មីស៊ីលរយៈចម្ងាយឆ្ងាយនិងការធ្វើតេស្តអាវុធនុយក្លេអ៊ែរឡើងវិញ នៅចំពោះមុខការជាប់គាំង​​នៃកិច្ចប្រឹងប្រែងចរចាស្តីពីបញ្ហាអាវុធនុយក្លេអ៊ែរជាមួយសហរដ្ឋអាមេរិក។ ប៉ុន្តែការធ្វើបែបនោះ អាចនឹងបង្កឲ្យទំនាក់ទំនងប្រទេស​ទាំងពីរត្រឡប់ទៅដូចកាលពីឆ្នាំ២០១៧វិញពុំខាន ដែលជាពេលភាពតានតឹងបានកើនឡើងកម្តៅយ៉ាងខ្លាំង៕